Vawiin chawhma khan Dr ZR Thiamsanga, Champhai North MLA leh Vice Chairman Health & Family Welfare Board nibawk chuan DM Hospital Champhai Vengthlang tlawhin Mizoram State Health Care Scheme (MSHCS) chungchang hrilhfiahin zawm turin a sawm a, Hospital thuneitute pawhin an lo zirchian thu leh Mizoram State Heath Care Scheme an zawm tur thu an lo thlen a ni.

Inkawmhona leh inhrilhfiahna hun buatsaihah Dr ZR Thiamsanga chuan Mizoram Sawrkarin mipuite hriselna a ngaipawimawh em em a, Mizoram State Health Care Scheme huapzo tak kalpui anih theihna turin Chief Minister leh Health Minister ten theihtawp an chhuah a ni, a ti a. Mizoram State Health Care Scheme kalpuina tura notified rate bituk chungchangah Non Government Hospital Association nena inremlohna awm chu pawi a tih thu sawiin, Sawrkarin a bituk hi hman phawta, a tul anih chuan la ennawn leh zel theih a ni, a ti a. Mizoram State Health Care Scheme hmangin chhungtinin damloh inenkawlna senso atan kum tin cheng nuai 2 thleng an bill thei dawn a, Central Scheme ABPMJY, Golden card an tih mai nena kalkawp thei tura duan a nih thu a sawi a. Sawrkarin MSHCS atan cheng vaibelchhe 150 corpus a dah tawh bakah vaibelchhe 50 dang dah belh lehin cheng vaibelchhe 200 a lo tling khawm thei ta a, a hma lo dahtawh pung nen chuan cheng vaibelchhe 202 a awm mek a ni, a ti a. Tin heng bakah hian hmanchawp mai theih, thla ruk thlenga daih tur cheng vaibelchhe 20 lai SEDP atanga dah ani, a ti bawk. A hmaa insurance mode a kalpui thin chu MSHCS hnuaiah chuan Bill te tangloa chak zawka kalpuia kar 2 hnu vela pek chhuah hman zel tum a nih thu a sawi a. Private Hospital te a theihna chenah sawrkarin puih a huam reng thu sawiin, Sawrkarin ruahmanna a rawn siam MSHCS notified rate chu pawm turin a ngen a. Damdawi In te pawh Clinical Establishment Act behchhana level hrang hranga thliar a, chutiang zulzuia rate te pawh siam tum a ni, a ti a. MHCS chuan natna a huam deuh vek bakah OPD, Dialysis leh adangte in admit kher lo te pawh a huam vek thu a sawi a. Empanelment hlihsak tawh ten MSHCS an zawm chuan Scheme hman anih atanga Bill te pawh pawmsak vek an nih dawn thu a sawi bawk.

He hunah hian DM Hospital Manager Pu Lalhmingliana chuan Vice Chairman Health & Family Welfare Board in a rawn tlawh chu lawmawm tiin, MSHSC chu Hospital lam pawhin an lo zirchian thu leh mipuite hmakhua ngaia an zawm dawn thu a sawi a ni.

DM Hospital, Champhai Vengthlangin Mizoram State Health Care Scheme a zawm tak avang hian Mizoram sawrkarin empanelment a lo hlihsak tawh chu tihnun thar leh anih tur thu Dr ZR Thiamsanga, Vice Chairman, Health & Family Welfare Board chuan a puang nghal a ni.