Sawrkar laipui Ministry of Environment, Forestry and Climate Change (MoEF & CC) changtu Union Minister of State Pu Prakash Javadekar chuan vawiin chawhnu khan zan khat riak turin Aizawl a lo thleng a, Thuampui Helipad-ah Mizoram State a Environment & Forests Minister Pu Lalrinmawia Ralte, Principal Chief Conservator of Forests Pu Lalram Thanga leh sawrkar mi pawimawh dangten an lo hmuak a ni.

MoEF & CC Minister Pu Prakash Javadekar chuan vawiin tlai khan Advanced Research Centre for Bamboo & Rattan (ARCBR) tlawhin a hmun hma a fan zawh hnuah Bethlehem Vengthlang-a State Forest Training Institute (SFTI) Building thar a hawng nghal a. Hawnna programme SFTI tual zawla buatsaihah Union Minister chuan ‘tichhe lova hmasawnna rahbi thar kai’ (development without destruction) chu a thupui a nih thu a sawi. Pu Prakash Javadekar chuan India ramin hmasawnna hna chak taka a thawh lai mek hian min hualtu boruak, thing leh mau leh nungchate tichhe lo zawnga hma lak chu sawrkar duh dan a ni a, he chona hmachhawn tur hian state leh central sawrkar te an pawimawh a ni, a ti a. Forest venhimna kawnga mipui pawimawhzia sawiin a venghimtu dik tak mipui an tel tam loh chuan a hlawhtling thei lo va, sawrkar laipui chuan a hmalakna kawng tinrengah mipui a dah pawimawh ber a ni, a ti. Mizoram chu mau tamna ram a ni a, a hman tangkai dan leh suma chan tir dan erawh kan la thiam tawk loh avangin mi tam tak tana eizawnna tha pe theitu mau hi tangkai zawka hman dan zawn a ngai a ni, a ti a. Mizoram leh North East state dangte chu MoEF & CC thlirna atang chuan India ram rohlu a ni, a ti bawk.

Pu Lalrinmawia Ralte pawhin thu sawiin Mizoram chu Indo-Myanmar Biodiversity hot spot a nih avangin a pawimawh hle a ni, a ti a. Hmasawnna hma thar lak avangin kan ramhnuai neih mekte vah darh a tul chang a awm a, kum kalta khan Mizoram forest cover tlema a tlakhniam thu sawiin thing leh mau, nungchate humhalh chunga hmasawnna hna chak taka thawh dan kawngah ngaihtuahna thar sen a tul a ni, a ti.

SFTI hawn tak hi kum 2011 khan sak tan niin kum 5 chhunga hawn hman tura ruahman a ni a. Hun bituk aia reilo hretah peihfel hman a ni. State Project Management Unit kaltlanga hna thawh a ni a, sum hi sawrkar laipui MoEF & CC pawmpuina in Japan International Corporation Agency (JICA) atanga hmuh a ni a. Heta tana sum ruahman chu a pumpuiin cheng 547.408 lakhs a ni a, cheng 479.347 lakhs release tawh niin cheng 458.567 lakhs hman ral tawh a ni.

MoEF & CC Minister hian mau hmanga eizawngtu bamboo artisans leh entreprenuers te bakah private tree planters te kawmna hun a hmang nghal a. Vawiin tlai vek hian Mizoram Governor leh Chief Minister-te an chenna inah a hmu bawk. Naktuk hian Tripura panin Aizawl a chhuahsan ang. Union Minister hi Addl.Director General of Forests, MoEF & CC, Pu Anil Kumar chuan a tawiawm a ni.