Sports and Youth Services, UD&PA etc. Minister Pu Zodintluanga chuan nimin (8.1.2016) khan Champhai Zotlanga Sports Stadium sak mek chu enfiahin, Sorkar laipuia Ministry of Urban Development atanga cheng nuai 2230 chuang senna tur sak mek chu Mizorama Stadium puitling neih hmasak ber tur leh Indian Super League hial pawh thleng tlak a nih tur thu a sawi. Minister hi Parliamentary Secretary Pu TT Zothansanga bakah UD&PA, PHED leh Sports Department atang officials ten an tawiawm a ni.

Zotlanga Sports Stadium hi kum 2014 March ni 15 khan sak tan a ni. Ram sqm. 23362 a zau a awh a, a hmunah hian World Class 6000 sqm. Synthetic Turf inkhelhna, World Class 8 lane synthetic running track, Boxing hall leh motor engemawzat park theihna awm dawn a ni. Champhai bakah hian Serchhip, Kolasib leh Lungleiah te Stadium sak mek a ni bawk.

Nimin vek khan Minister hian Hnahlan Zone Football Tournament buatsaih chu hawnna hun a hmanpui a. Thu sawiin MInister Pu Zodintluanga chuan infiamnaa Mizoram hmasawnna chu India ram hmel tidanglamtu a nih thu leh, Sports-ah Mizo ten India ramah a hmun pawimawh an luah kim tawh hle a ni, a ti a. Chutihrualin infiamna lamah nasa takin hmasawnna mah ila, Zirna lamah nasa zawka tan lak a tul thu tarlangin, Central Service lamah kan in sawr bing a tul thu leh, IAS leh central service lamah Mizote kan lang tlem ta hle, zirna tha zawk leh khawsak nuam zawka zirna kawng zawh thei tunlai thalai te hian kan rual u te hi kan entawn a tul tak meuh meuh a ni, Minister chuan a ti.

Champhai North Bialtu MLA, Parliamentary Secretary Pu TT Zothansanga pawhin bial chhungah infiam mi tha tak tak an awm thu leh, hlawhtlinna duhawm tak tak nei an awm tawh thu a sawi a. Taimakna leh rinawmna nen ke pen chuan hlawhtlinna kawng a inhawng zel dawn a ni tiin thalai kalkhawm te chu nun uluk thiam turin a chah bawk.

Thusawitu dang, Pu Laltlanthanga, Mizoram State Sports Council Secretary chuan, tunlaiah infiam mi, ti tak tak peih tan chuan hlawhtlinna duhawm tak an chan thin thu sawiin, infiammi hlawhtling te chu officer lian tak tak te ai pawha sum an lak luh tam zawk tawh thu a tarlang a. Mizoramin infiamnaa hlawhtlinna a chan 70% dawn hi thingtlang lama kan infiam mite hlawhchhuah a nih thu sawiin, insumna leh taimakna, hlawhtlin tuma bei fan fantute tan sorkar a in hawn reng thu leh chhawmdawlna nasa taka an kal pui thu a sawi a ni.

Minister ho hian tlai lamah Champhai Tlangsam Field a tlawh nghal a ni bawk.