Mizoram mamawh hrang hrang bawhzuia New Delhi- a cham mek Chief Minister Pu Zoramthanga chuan nimin khan Union Minister of Health and Family Welfare Dr. Harsh Vardhan chu a pisaah a kawmin, hriselna lama  Mizoram mamawh hrang hrang an sawi dun.

Chief Minister chuan kum khata upa Zoram Medical College tihchangtlun chu sorkarin a ngaipawimawh hle thu a sawi a. Super-Speciality Hospital ni tura thuam that zel a tul thu sawiin hei hi a remchan loh pawhin Speciality Hospital-ni tura din chhoh zel a tul thu leh Staff Quarters leh hmeichhia leh mipa tana hostel changtlung tak din thuai a tul thu a hrilh. Union Minister chuan hengte hi tunhnaia hawn tak Pradhan Mantri Swasthya Suraksha Yojana(PMSSY) hnuaiah tih theih a beiseiawm thu a sawi.

Chief Minister chuan district thar pathumte tan district hospital din thuai a tul thu sawiin hei hi Union Minister chuan National Health Mission(NHM) hnuaiah rawtna a  hnena thlen thuai turin a hrilh bawk. Mizoram a Aspirational District awm chhun Mamit District tan district hospital awmsa chu tihchangtlun leh thuam that a tul thu CM Pu Zoramthanga chuan a sawi bawkin, hemi chungchangah hian Detailed Project Report (DPR) siam thuai turin leh a lo enzui tur thu Union Minister chuan a hrilh.

Mizoramin Central Pool hnuaia MBBS quota kan neih thin, tunhnaia tihtawp tak  chu neih let leh dan awm se a duh thu  Pu Zoramthanga chuan Union Minister hi a sawipui bawk a. Ani chuan khawi state pawhin ama puala Medical College a neih tawh chuan Central Pool hnuaia MBBS zirna quota chu tihtawp nghal a nih thin avangin he harsatna hi India hmarchhak state thenkhat pawhin an tawh thu a sawi bawk.

Chief Minister hi State Planning Board Vice Chairman Pu H. Rammawi, Resident Commissioner leh official dangten an tawiawm a ni.