Food, Civil Supplies & Consumer Affairs (FCS&CA) Department chuan nizan khan Godfrey Tower, College Veng-ah Public Awareness Campaign on LPG Home Delivery an buatsaih.
He hunah hian Dr. Lalhriatzuali Ralte, Director, FCS&CA chuan gas home delivery tihpuitlin theihnan tun hnaiah Department-in chak takin hma a la a, Supply Minister Pu K. Lalrinliana’n a ngaipawimawhin tan pawh a la nasa hle a, Department officials zawng zawngte pawhin theihtawp an chhuah a ni a ti a. Supply Department chuan kum 1999 atang daih tawh khan eirawngbawlna gas home delivery ti turin hma lo la tan tawh mahse, Mizorama khua/veng hmunhma remloh vang te, LPG mahmawh ang zat supply hmuh theihloh vang te leh harsatna hrang hrang vangin tun thlengin tihpuitlin theih a la ni lova. A chhan lian tak pakhat chu Indian Oil Corporation (IOC) Ltd. in home delivery charge a phal zat cylinder pakhatah Rs. 18.57/- (tunhnaiah Rs. 20.50/-) hi keini tlang ram tan chuan a tlem lutuk vang a ni a ti a. Pilot Project anga bul an tan thei tur chu thil chhinchhiahtlak tak a ni tiin he ruahmanna thar hi tha taka tawiawm turin mipuite a sawm a. Supply Director hian Awareness Campaign leh LPG Home Delivery Campaign na atana siam Video clip a tlangzarh nghal bawk a ni
LPG home delivery hi pilot project angin College Venga LPG consumer thlanchhuahte hnenah September, 2019 atangin kalpui tum a ni a, a tahtawlin veng dangah pawh tih chhunzawm zel tum a ni. He ruahmanna hi a tirah buaina thlentu angin lang mahse khuareiah mipui tan hamthatna leh awlsamna thlentu anih dawn avangin FCS&CA department chuan LPG consumer te, MIDA te, NGO te, Local Council te leh mipuite tawiawmna leh thawhpuina tha an ngen a ni.
LPG home delivery ti tur hian online booking (IVRS/SMS/Internet) tih a tul dawn a, consumer ten anmahni bialtu LPG distributor kal chilhin an book tir thei bawk ang. LPG online booking ti thiamlo te tan FCS&CA department chuan video clip a siam a, a tul angin inzirtirna kalpui mek zel a ni. Hriatchian duh nei tan Indane Toll Free No. 1800-233-3555 ah zawhchian theih a ni bawk ang. LPG home delivery hi vawilehkhata kalpui nghal huk a nih chuan consumer te tan harsatna a siam hlau in FCS&CA department chuan veng thlan bikte atanga bul tanin chak tak leh fimkhur tak siin hma a la mek a ni.
He hun hi Pu Lalsanglura, Chairman, Local Council, College Veng in kaihruaiin, Pu C. Lalhmachhuana, Pesident, YMA College Veng branch, Pu Thanglura, Vice President, MCU Mizoram, Pu C. Zomuana President, MCU College Veng Branch ten thu an sawi a. Pu K. Laldawngliana, Chairman, Mizofed Gas Agency- hnen atangin Home Delivery kalpui dan tur leh tihdan tur inzirtirna ngaihthlak a ni a, mipui lam atangin hriatthiam loh inzawhna hun neih zui a ni bawk.
