Vawiin chawhnu khan Union Home Minister Pu Rajnath Singh kaihhruaina hnuaiah  Mizoram Chief Minister Pu Lal Thanhawla; Manipur Chief Minister Pu N Biren Singh; Arunachal Chief Minister Pu Pema Khandu; Nagaland Chief Minister aiawhin an Home Minister Pu Y. Patton; Minister of State for Home Pu Kiren Rijiju; Mizoram Home Minister Pu R. Lalzirliana leh Arunachal Pradesh Deputy Chief Minister Pu Chowna Mein ten India leh Myanmar ramri chungchanga thil pawimawh tak tak sawi hovin Mizoram Legislative Assembly Annexe Conference Hall-ah meeting an nei. Ramri hrul leh a depa awm khuate tihhmasawna dan te, ramri venhimna leh ramri tih chian kawnga hmalak tum dan te, ramri hrula awm ram pahnih khua leh tui te inkalpawh dan tha leh a kal te chhinchhiah dan tha zawk te pawh meeting ah hian an sawiho a. Meeting ah hian ramri hrul tih hmasawn nana mamawh zirchiang turin Committee din rel a ni a. Ramri kanna ruahman Free Movement Regime (FMR) awm mek ang khat leh felfai zawka kalpui ani thei he thil zirchiang turin Committee din rel a ni bawk. 

Union Home Minister Pu Rajnath Singh chuan Hmarchhak bial chak taka tihhmasawn kawngah Sawrkar chu an intiam tlat thusawiin inkalpawhna kawng lamah te, rel leh thlawhnaa inthlunzawm naah te, kawlphetha siamchhuah kawngah te, zirna lamah te, hriselna kawngah te leh zirna in sang zawk leh zirbingna kalpui tura zirna in abika dinna kawngah te hmasawnna a awm mek a, hun reilo teah Smart City ruahmanna hnuaiah Hmarchhak bialin tunlai khawpui changkang tak tak in nei fur dawn a ni, a ti. 

Union Home Minister hian Border Area Development chungchang sawiin BADP hi ramri hrula awm khua te abika tihhmasawn nan state 17 ah kalpui mek a ni, a ti a. BADP hnuaia sum ruahman, 2016-17 a cheng vaibelchhe 990 ni chu 2017-18 atan cheng vaibelchhe 1100 a tihsan a ni tiin kum thum 3 kalta khan hemi hnuaiah  Mizoram, Manipur, Nagaland leh Arunachal Pradesh tan cheng vaibelchhe 567.39 pek a nih tawh thu a sawi a. Sawrkar Laipuiin India leh Myanmar ramri hrulah kawng thar sial hna leh helipad siam hna kalpui mek a tum tih sawiin  hemi atan hian Assam Rifles in ruahmanna an thehluh tawh thu a sawi.  

Home Minister chuan ramri a cheng  mipuite hlima, himna leh an mamawh te phuru chu a pawimawh leh a tul tih sawiin State Sawrkar te chu heng hmun kilkhawra cheng ten nitin khawsak an neih theih nan leh a nun chawikan nan te, kawng, kawlphetha leh inbiakpawhna ruhrel lam te, hriselna leh zirna te a bika ngaipawimawh turin a chah a.  Home Minister chuan hemi atana mamawh leh tul te zirchian gap identification tifel tha a tih thu a sawi a. Chungte chu short term kum 3 chhung; medium term kum 3 atanga kum 6 inkar chhung leh long term kum 6 atanga kum 10 chhunga tih theih ang te in thliar nise a ti a. Heng tihhlawhtlin nan ramin theihtawp kan chhuahin tan kan lak a ngai dawn a, hemi atan hian Ministry hrang hrang te leh State Sawrkar te kan tanho a ngai dawn a ni a, sum mamawh belh te chu NEC, NLCPR leh BADP atangin a ruahman theih a ni, a ti.  He thilah hian Home Minister chuan Secretary Border Management kaihhruaina hnuiah Committee dinin tur thu a ti tlu a, Committee hian an thil hmuh dan chu December ni 31, 2017 ral hmain an thehlut dawn a ni.    

Home Minister chuan intlawhpawhna leh inthlunzawmna tha zawk Hmarchhak bial chhung leh kan thenawm ram te nen kan neih chuan thilsiam (goods) leh services a tlang awlsam zawk thei anga hei hian mipui intlawhpawh pawh a ti awlsamin a pui thei dawn a ni, a ti. Inkalpawhna, inthlunzawmna leh inlaichinna tha zawk kan neihte hian Hmarchhak thanna leh hmasawnna tur kawng a hawng dawn chuvangin Indo-Myanmar ramri pawimawhna chu hun lokal zel turah a sang chho dawn tiin hemi lo dawngsawng turin Central leh State Sawrkar te hi kan in ruahman lawk a ngai dawn a ni tiin thurawn a pe a ni. 

Ramchhung venhimna chungchang a sawinaah Home Minister chuan India-Myanmar ramri hi ralmuangin muanna awm mahse, Myanmar nena kan ramri hi a sensitive a ni, a ti a. Kilometre 1643 a thui, Arunachal Pradesh, Nagaland, Manipur leh Mizoram dep, India leh Myanmar ramri in danglamna tam tak a neih thu te, Ramri atanga kilometre 16 huam chhunga cheng mipuite chu visa lehkha ngai lovin ramri kana an intlawhpawh theih thu te, hemi hnuaih darkar 72 an cham theih thu te, hetianga tih chhan chu ramri a awm mipuite hi hmasang atang tawhin inlaichinna tha leh inunauna an neih avangte, an tan, thil tangkai tak niin kawng tam takin an hlawkpui thu te meeting ah hian a tarlang a. He ruahmanna tangkai leh danglam tak hi firfiaka che thin leh misual ten ralthuam, ruihlo leh damdawi, danin a phal loh bungrua te leh pawisa lem te tawlh ruk nan diklo takin an hman thin thu te. Helai biala venhimna hmalakna a that chhoh tak ah, heng firfiaka che te tan inkhuarna leh hmun neihte a theih tawh loh thu te, a then te chu ramri pelin an insawn thu te. He ramri kanna ruahmanna tha tak hmangin heng mite hianIndia ah lo lutin thil sual leh kawhmawh an bawl hnua, ramrikan a, an inkhuarna buk him ah te an let leh mai thin thu te a sawi. 

Pu Rajnath Singh chuan India leh Myanmar ramri kan theihna dan leh hrai awmsa leh ruahmanna neih mekte, leh tuna state pali ten an hman dan leh an kalpui mek dan zirchiang turin Ministry of Home Affairs a Special Secretary Internal Affairs kaihhruaihna hnuaia Committee din a remti a. Fiarfiak che te, misual te dan phal loh thil te a luh loh nan leh hengte thlitfim an nih theih nan, he ruahmanna hi felfai taka hman tangkaia, ramri hrula cheng mipuite tan harsatna thlen lo zawngin, he ruahmanna hi kalpui a tul thu meeting ah hian sawilan a ni. Committee hian zalen taka inkalpawh ruahmanna hman mek hi angkhat leh felfai zawka kalpui a nih theih nan rawtna an siamte chu thla 3 chhungin an thehlut dawn a ni.

Pu Rajnath Singh chuan India leh Myanmar ramri vengtu Assam Rifles hnathawh chungchang sawiin tumruhna leh theihtawp chhuahin an hna an thawk mek a, venhimna hna an thawh piah bakah Hmarchhaka firfiak leh hel zawnga che te an thunun a, harsatna hrang hrang karah an mawphurna hi  hlenchhuakin ram tan theihtawp an chhuah mek a ni, a ti a. Assam Rifles hian phur leh tha zawka an hna an thawh zel theih nan tualchhung kaihhnawih an thu leh hla thlen te ngaihpawimawh sak turin Chief Minister te hi a ngen a ni. 

Pu Rajnath Singh hian ramri a Ground of Zero Line tihchian nan ramri  kham nan subsidiary pillar phunna leh siamna tur atan survey hnaa State Sawrkar te tanpuina leh thawhpuina mamawh anih thusawiin theihtawp chhuahpui turin State Sawrkar te a sawm a. Ramri a hnathawh (construction) ngai leh tul te chu 'No Construction Zone' hnaih lovin tih nise a ti a. Indo-Myanmar ramri a ramri kham te joint survey ah Chief Minister te leh tualchhuang mipuite tawiawmna a ngen bawk a ni. 

Pu Rajnath Singh chuan Indialeh Myanmarramri kilometres 10 chhung ah hian Indialamah khua 240 leh mihring nuai 2.5 vel awma chhut a ni a ti. Helai bawra venhimna hna, tha zawka thawh anih theih nan police station leh police post te hawng turinChief Minister te a ngen a. Hei hian ramri ah dan phal loh thil illegal cross-border activities te a ven theih thu leh ramri enkawlna tha zawk kawngah thui tak a puih theih thu a sawi. 

Chief Minister-te hian Agenda pharh leh Department of Border Management leh Assam Rifles ten hemi chungchanga presentation an siam ah an ngaihdan te sawiin rawtna te an siam a. An state huamchhung theuh a ramri chungchangah venhimna ruhrel leh hmasawnna chungchangte an sawi bawk a ni.             

Chief Minister Pu Lal Thanhawla chuan Hmarchhak bial chu ramchhung hmun dangte nen khaikhinin a danglam bik thu sawiin he a danglamna hi India ti ropuitu leh ti mawitu a ni a ti a. Union Home Minister-in Aizawl ah he meeting pawimawh tak a koh avangin a chungah lawmthu a sawi a. Mizoram leh Myanmar ramri dep a thil tul leh mamawh a sawinaah ramri a kawng chungchangte, Champhai-Zokhawthar kawng chungchangte, Kaladan Multi Modal Tranpsort Transit Project (KMTTP) dihmun te, Act East Policy chungchangte, ramri a ‘No Construction Zone’ dinhmun leh metre 10 chhunga hma lakna awm lo tura tih chu palzam a nih thin thu te, ramri kanna ruahmanna Free Movement Regime chungchangte, ramri venna kawnga Border Wing Home Guards din chungchangte meeting ah hian a tarlang a ni. 

Insumdawn tawnna tha zawka dawl turin Zokhawthara Lei chu Permanent Two Lane Bridge ah siam a tul thu a sawi a. KMTTP hna chak zawka a kal theih nan lei 8 dawh chu a bika ngaihpawimawh a tul thu te leh he hna hi chak zawka thawh ani theih nan Ministry of Forests, Environment leh Climate Change phalna chu pek vat a tul thu te meeting ah hian a sawi a. Myanmar nena inkalpawh leh intlawhpawh theih ruahmanna Free Movement Regime hi Mizoram leh mipuite tan thil tangkai leh hlawk tak, inlaichinna leh in unauna tha min neih tir tu a ni a ti a. Mizoram sawrkar chuan Free Movement Regime felfai zawka kalpui ani thei ruahmanna a siam mek thu meeting ah hian a sawi a. Hemi atan hian Mizoram hmun 4 ah dan in a phal crossing point siam a ni tawh tih a sawi bawk. Mizoram leh Myanmar a awm te hian inlaichinna thuk tak leh nghet tak kan nei tiin hmun thenkhatah he ramri hung chu tha a tih loh thu Chief Minister hian a sawi a. Ramri a venhimna hna tiphuisui turin Border Wing Home Guards din a rawt bawk a ni. 

Chief Minister hian BADP in ramri a hmasawnna tha leh tluantling a thlen tih sawiin ruahmanna tha tak a ni a ti a. Ram pahnihin Mizoram a karcheh avangin a dinhmun a pawimawh a, kan state hi state ralmuang anih avangin thenawm state a hel pawl ten kawngka ah an hmang fo thin a, kan police force ten heng hi dang turin theihtawp chhuahin hma an la zel a ni, a ti a. Remna leh muanna hian man a nei a, hei hi Central Sawrkarin a hriat a pawimawh a, chuvangin state ralmuang kan nih angin Security Related Expenditure Scheme hi chhunzawm a pawimawh a ni, a ti bawk. 

Arunachal Chief Minister Pu Pema Khandu, Manipur Chief Minister Pu N. Biren Singh leh Nagaland Chief Minister aiawhtu an Home Minister Pu Y. Patton te pawhin thu an sawi bawk a ni. 

Meeting ahhianStatepali Chief Secretary te leh DGP te, Sawrkar Laipui Ministry hrang hrang hotulu te, Security agencies hotulu te leh Assam Rifles hotulu te an tel a ni.