Sawrkar laipui Ministry of Youth Affairs & Sports, NSS Regional Directorate,Guwahati leh State NSS Cell, Mizoram buatsaihin vawiin khan Govt. Zirtiri Residential Science College-ah National Service Scheme (NSS)-te tan Life Skills, Leadership and Personality Development training bul tan a ni a. Hawnna inkhawm hi Parliamentary Secretary Pu Hmingdailova Khiangte chuan khuallian niin a hmanpui a ni.
Khuallian chuan zirlaite chu nakin lawkah an chhungkua theuh leh ram innghahna an la nih dawn avangin kawng tinrenga puitlin zir leh hruaitu tha nih an zir a tul, a ti a. Hruaitu tha chuan hma thlir tha tak leh tum bulfuk tak neiin a hote a hruaia, an thil tum ti hlawhtling turin a hote fuih leh tih phur dan a thiam a, harsatna pawh tawk sela innghirngho mai lova nghet taka an inzawm khawm theihna turin tan a la thin tiin hruaitu tha ni tura inbuatsaihna training pawimawh tak nei mek zirlaite chu theih tawp chhuah turin Parliamentary Secretary Pu Hmingdailova Khiangte chuan a fuih a ni.
Life Skills, Leadership and Personality Development training ah hian Govt. Zirtiri Residential Science College, Modern Hr.Sec.School, Mamawii Hr.Sec.School, Helen Lowry Hr.Sec.School, Public Hr.Sec.School, Republic Hr.Sec.School, Phullen Hr.Sec.School leh Serchhip Hr.Sec.School atangin zirlai sawm theuh an tel a. Training Coordinator chu Dr. Zirlianngura, State NSS Officer cum Deputy Secretary, NSS Cell a ni.
Ni 5 chhung awh tur training-ah hian Ministry of Youth Affairs & Sports, NSS Regional Directorate,Guwahati-a Regional Director ni mek Sunil Kr. Basumatary bakah trainer pathum dang Guwahati atangin an lo kal a. Mizoram chhung leh pawn atanga lo kal mithiamten subject thlan bik hrang hrang - personality development, interpersonal relationship, communication skill, manners and etiquette, creative and critical thingking tih te leh thupui pawimawh dangte hmangin zirlaite an zirtir dawn a ni. Aizawla training neih zawhah hian Lungleiah buatsaih chhunzawm leh a ni ang.
