Vawiin  khan Pu Ronald Sapa Tlau, MP, Rajya Sabha chuan Tlungvel khua chu Sansad Adarsh Gram Yojana(SAGY) Model Village atan a thlang a.  Model Village a puanna hun hi Venghlun YMA Hall, Tlungvel ah neih a ni. 

Pu Ronald Sapa Tlau, MP, Rajya Sabha chuan Mizoram khaw 800 chuang zingah model village atan Tlungvel khua thlan a nih chhan te  sawiin  khaw mipui te chuan model village an nih ang ngeia a taka hna an thawhrim zual bik leh  tan an lak a ngaih thu sawiin Tlungvel khaw mipui te chuan Model Village chu khaw entawntlak tihna a ni tih an hriat reng a beisei thu a sawi a. Sawrkar duhsakna chiah beisei lova rim taka thawk chunga  sawrkar hmalakna te an thlawp zel chuan hlawhtlinna lian tham zawk pawh an hmuh zel a rin thu a sawi a. Tanpui tlakloh te tanpui chu hun, sum leh tha khawhralna mai a nih thu a sawi a. SAGY thiltum tih hlawhtlin nan pawh tanpuina petu sawrkar ai mahin tanpuina dawngtu leh Tlungvel mipui te an pawimawh zawk dawn a ni a ti. 

Model Village a puanna hun hi Pu V.Lalengmawia, Project Director, DRDA, Aizawl District in a kaihruai a. He hunah hian SAGY Model Village kalphung tur computer hmanga entirna leh hrilhfiahna hun neih a ni a. Pi K.Lalrinzuali, State Nodal Officer, SAGY & Addl Secy, RD pawhin SAGY thiltum leh fuihna thu a sawi a ni.