169/2022-2023 

Aizawl, 16^th April, 2022: Pu Pankaj Kumar Singh, Joint Secretary (Coordination and North East), Ministry of Housing and Urban Affairs, Govt. of India chuan ni thum chhung Mizoram hmun hrang hranga sawrkar hmalakna a tlawh hnuin tukin khan Deputy Chief Minister Pu Tawnluia chu a chenna inah hmuin an inkawm a, Deputy Chief Minister hi a department enkawl UD&PA leh PHED hotu lian ten tawiawmin tukthuan a lo buatsaih bawk a ni. 

Deputy Chief Minister hian Union Joint Secretary chu lo lawmin Mizoramah ngei rawn kala hmalaknate a rawn en chu fakawm a tih thu a sawi a, hetiang taka rawn ngai pawimawhtu hi an tam thin lo hle tih a sawi a, a deparment chan hnuaia sawrkar laipui scheme hrang hrang chungchangte leh hmalak chhunzawm dan turte a sawipui a ni. 

Pu Pankaj Kumar Singh pawhin Mizoram sawrkarin a lo dawnsawn danah lawmthu a sawi a, Mizoram chhunga a department chan hnuaia hmalaknate a theih ang anga chuipcjhiara a tlawh thu leh a hmuh tawh chinah sawrkar hmalakna a that thu leh lawmawm a tih thu a sawi a, Mizoram chu nuam a tih thu leh hmalakna hrang hrangte a taka a hmuh  chuan Delhi tlang atanga an lo ngaih ang ngawt a nih loh thu sawiin, amah pawhin hlawkthlak a tih thu a sawi a, hmalak meknate a hlawhtlin vek theih nan theihtawp a chhuaha a ngaihven zui tur thu sawiin Deputy Chief minister leh Department hotuten rawtna chi hrang hrang an thlente chu theihtawp chhuaha a bawhzui tur thu a sawi bawk a ni. 

Pu Pankaj Kumar Singh hi India hmarchhaka urban schemes leh programmes te vil tura ruat niin, April ni 13, 2022 khan Aizawl a lo thleng a, a cham chhung hian PHED, UD&PA SIPMIU hm alkan chi hrang hrang a tlawh a, chung zingah chuan Zuangtuia PHED Biodigester Plant, UD&PA (SIPMIU) in Bethlehem Vengthlanga Aizawla veng 16 in an hman tur 10 MLD Sewage Treatment Plant sak mek, Dihmunzawla Greater Aizawl Water Supply Phase I & II-in chak zawka tui a pumpt theihna tura 132kV Substation bun mek, MINECO 10% Lump sum scheme hnuaia building sak chi hrang hrang, Industrial Growth Centre, Sakawrtuichhuna SIPMIU–in NERUDP programme hnuaia 37 MLD Water Treatment Plant a siam mek te bakah Kolasib-a 10% Lump sum scheme hnuaia hmalakana hrang hrang - Bridg. C. Vankunga Building Shopping Complex, Diakkawn.  Kolasib Stadium bakah Kolasib leh a chhehvela kawng sial te a en a ni.  

PHED leh UD&PA officialte nen inkawmhona hunt ha tak neiin sawrkar laipui hnuaia an project/scheme thawh chi hrang hrang report felfai taka an pe thei chu lawmawm a tih thu Union Joint Secretary hian a sawi bawk a ni. 

Union Joint Secretary hi  vawiin khan New Delhi panin a thlawk haw a, a haw hma hian Treasury Square-a ICCC - Intergrated Command and Control Centre a tlawh bawk a ni.