Nimin tlai khan Chief Secretary Conference Hall, New Secretariat Complex-ah Union Agriculture Minister Pu Sharad Pawar Mizoram tlawh a lo zin tur dawnsawn dan tur relin Agriculture Minister Pu H. Liansailova hovin sorkar mi pawimawhte an thukhawm.

Pu Sharad Pawar, Union Agriculture Minister hian April ni 29 khian zankhat riakin Mizoram a rawn tlawh dawn a. Mizoram dinhmun dik tak leh harsatna a tawhte a hmun ngeiah enfiahin hmarchhak hmun hrang hranga mi tam zawk eizawnna, tlangram lo neih dan (Shifting Cultivation) a en anga, Mizo lo thenkhat fanpui a ni ang. Ruahman lawk dan chuan Union Minister hian Aizawl a cham chhungin Chief Minister leh mi pawimawh dangte a kawm  anga, All Mizoram Farmers Union hruaitute a hmuh bakah College of Veterinary Sciences, Selesih leh Horticulture Farm, Chite a tlawh anga, Press mite kawmna hun a hmang bawk ang. Pu Sharad Pawar hi Union Agriculture Secretary, Additional Secretary, Jt. Secretary, ICAR Director General leh Central sorkar official pawimawh dangten an tawiawm ang a. April ni 30 tlaiah Mizoram a chhuahsan leh ang.

Nimin meeting-ah hian State Planning Board Member Secretary Pu PL Thanga IAS (Rtd), Chief Secretary charge la mek Pu K. Riachho, Horticulture Secretary Pu T. Sangkunga, Agriculture Secretary Pu TV Fambawl bakah a kaihnawih Department hrang hrang hotute an tel a ni