Vawiin khan Mizoram Civil Service Association (MCSA) General Conference vawi 36-na chu Tourist Lodge, Chaltlang-ah neih a ni a. Education Minister Pu Lalsawta chu khuallian a ni.

Khuallian chuan MCS te chu Mizoram mipui tana kaihruaitu tha, kawng kawhhmuhtu pawimawh leh harsatna engpawh lo thleng sela ram mipuite thlamuantu an ni tur a ni, a ti a. Ram rawngbawltu an nih anga an rawngbawlsak mipuite tana chhenfakawm, kawng engkima an finna leh thatna  avanga mite hriat hlawh ni ngei se a duhsak thu a sawi a. Tunhma lama Indian Civil Service (ICS) Officer-te India ram tana ban rinawmtak an lo ni tawh thin angin Mizoram tan MCS Officer-te pawh an nih ve ngei a pawimawh a ni, a ti a. Minister chuan sorkar inrelbawlna fel tak kenkawh a nih lohna ram chuan hma a sawn thei lova, inrelbawlna fel awmna ram apiang chu midang chungah an leng thin, a ti a. Dik tak leh fel takin, a tulna hun leh hmun apiangah huaisen takin MCS te chu thawk zel turin a fuih a ni. Education Minister chuan zirna chungchang pawh tarlangin Mizote rohlu neih that ber leh ram dang kan khum theihna kawng tha ber chu zirna a nih thu a tarlang a. Mizo khawsakphunga kan chin thin thil tha ni a lang tam takte hi a lehlamah zirna min pawtfualtu a ni fo thin a, chuvangin nu leh pate leh khawtlang pawhin ngaihtuahna thar hman a tul hle a ni, Pu Lalsawta chuan a ti.

Conference-ah hian MCSA President Pu P Lalchhuanga leh MCS Rtd thenkhatin thu an sawi a. Chawhnu lamah agenda 5 - Timely processing of MCS and adoption of Model Calendarof DPC, Cadre Review of MCS, Compensation of posts in the Selection Grade leh Amendment of Welfare Fund Rules tihte an sawihova. Office Bearers thar thlanna hun an hmang zui nghal a ni.