No.579/2021-2022

Aizawl, 19th May, 2021 : Vawiin khan Union Health Minister Dr Harsh Vardhan hovin India hmarchhak State 8 leh West Bengal Health Minister ten video conferencing hmangin COVID-19 hripui leng mek dona kawnga hmalakna leh a kaihhnawih chi hrang hrang sawiho a ni a. Health Minister Dr. R. Lalthangliana pawh he hunah hian telin Mizoramin COVID-19 dona kawnga hma a lak dan chi hrang hrang bakah mamawh a neihte a thlen a ni.

Dr. R. Lalthangliana chuan Mizoramah chuan mipui zawng zawng tangrualin COVID-19 hripui hi a huhovin theihtawp chhuahin an do tlang tih a sawi a, sakhaw hruaitute, NGO hrang hrangte nen tangrualin COVID-19 positive te enkawlna tur Community COVID Care Centre (CCCC) hmun hrang hrangah din anihn thu sawiin , hei hian sawrkar ruahman sa DCH, DCHC leh CCC te nasa takin a chhawk zangkhai a, CCCC te hian kohhran leh khawtlang leh sawrkar tangrualin mumal tak leh felfai takin hma an la a ni, a ti a. Mizoram sawrkarin Mizoram State Health Care Scheme a ruahman thu sawiin, he scheme hnuaia inziaklutte zingah COVID-19 hri kai an awm chuan he Scheme hnuaiah hian an inenkawlna senso Rs. nuai 2 thleng an bill thei tih a sawi a, sawrkar laipuiin COVID-19 positive enkawlna tur a ruahman sa DCH, DCHC leh CCC bakah COVID-19 second wave Mizorama a rawn thawh tan tirh atanga ruahmanna an siam zingah sawrkar leh khawtlang tangrualin an siam CCCC a inenkawlte pawhin an inenkawlna senso hi an bill theih thu Health Minister hian a sawi a ni.

Health Minister Dr Thangtea chuan COVID-19 hripui leng dona kawnga Mizoram sawrkar hmalakna a tarlan zingah India hmarchhak State zingah sample test kawnga hma la tha ber dawttu kan nih thu a sawi a, tunhnaia positive hmuhchhuah pun nachhan chu sample test a tam vang a ni tih sawiin hei hian hripuin darh chak tur chhut chah kawngah awmzia a neih ngeio a beisei thu a sawi a ni. Dr Thangtea chuan positive hmuhchhuah tam mahse he hripui vanga nunna chan chu Mizoramah mi 30 an ni tih a sawi a, theihtawp kan chhuah chungin kan theih chin piah lam thil avanga nunna kan chhan thei lo hi Mizoram mipui zawng zawng rilru a na a ni, tiin nunna chan hi positive hmuhchhuah atanga chhutin 0.32% a ni a, hei hian Mizoramin hripui leng dona kawnga hma a lak that zia, Zoram mipui zawng zawng tanrualna rah a nih zia a tilang a ni, a ti a. Hripui leng vanga Lockdown kalpui a tul mek lai pawh hian khawpuia chengte an harsat hlau in thingtlang khua ami ten an thlai thar chi hrang hrang a thlawnin khawpuia harsatna tawkte an rawn pe a, khawpui chhungah pawh harsatna tawkte chu kohhran leh khawtlang hruaitute nen tangrualin chhawmdawlna kan ngaihtuahsak thin a, he Mizoram mipuite tanrualna leh inhmangaihna hi hripui dona kawngah kan that i chaktu a ni, a ti.

Health Minister chuan Mizoramah COVID-19 vaccine kum 18 – 44 I karte tan kan pe tan mek a, hemi age group zingah hian sawrkar laipui atanga vaccine 16000 kan hmuh atangin ngaih pawimawh hmasak bik (priority group) kan siamte kan pe a, anni bakah hian midang pawh pek hmasak ngai, mipui rawngbawla chhuak thinte kan la nei a ni, a ti a. kum 18 – 44 inkar te vaccine pek tur pawh COVISHIELD siam chhuaktu Serum Institute hnenah full dose kan order tawh a, mahse engtikah nge kan dawn ve dawn tih a la hriat theih si loh a, sawrkar laipuiin kan khul turin nangmahni lam atang kawng min dap sak rawh u, a ti a. kum 45 chunglam vaccine pek kawngah pawh a tit ha ber state pathum zingah kan tel a, vaccine pek ngai hi tlemte an ni tawh ahei hi a rang lama rawn ngaihtuahsak turin Union Health Minister hi a ngen a ni. Heng bakah hian COVID-19 dona hmanraw chi hrang hrang PPE. RAGT kit leh thildang chi hrang hrang Union Health Minister hnena lehkhaa a thlen tawh chu chak lehzuala bawhzui sak turin a ngen bawk a ni.

Dr. R. Lalthangliana chuan India ram State hrang hrangah Mizote kan inzarpharh ve tawh a, kan naute leh kan fate Mizoram pawna chhan hrang hrang vanga awm an tamin COVID-19 hripui vanga harsatna tawk leh nunna chan an awm nual tawh tih sawiin, mizo tamna bik India hmarchhak state hrang hrang bakah, West Bengal, Gujarat, Maharashtra, Tamil nadu, Haryana, delhi, Karnataka, Telangana leh Andhra Pradesh-a an Health Minister-te hnenah an State a Mizo harsatna tawkte an awma lo ngaihsak tur leh lo tanpui tura ngenna lehkha a thawn thu sawiin, Mizoram sawrkarin State pawna damlo refer theihna (empanelled hospital) a neih damdawi in 32 a thuneitute hnenah pawh lehkha a thawn thu a sawi a, Mizo damlohna avanga harsatna tawk an awm a lo ngai pawimawh turin a ngen tih a sawi a ni.