Nimin chawhnua lo thleng Union Minister for Steel Pu Chaudhary Birender Singh chuan nimin tlai khan Aijal Club-ah ‘Development of Rural Sector by enhanced steel usage in Infrastructure & Housing’ and ‘Increasing Agri-Horti income of North-East’ Workshop a hmanpui a. He hun hi Commerce and Industries Minister Pu H. Rohluna’n a telpui a. Sawrkar laipuia Ministry of Steel hnuaia Public Sector Enterprises (PSUs) pahnih MSTC Ltd leh Rashtriya Ispat Nigam Ltd (RINL) tangkawp buatsaih a ni.

Khuallian Union Minister for Steel chuan Mizoram chu a vawikhat tlawhna a nih thu a sawi a. Sawrkar laipuiin India ram hmarchhaka inkalpawhna kawngah hma a sawn theih nan theihtawp a chhuah thu sawiin hmarchhak state ten ke an pen theihna turin kawng hrang hrang ah hma lak a nih thu a sawi a. A bik takin hmasawnna ruhrel atan nasa takin hmalak a ni, a ti a. Kar kalta mai khan North Eastern Council (NEC) scheme-te chu Union Cabinet-in a pawmpui tawh thu sawiin NEC Special Development Project phei chu 90:10 block grant atangin 100% grant-a thlak a nih thu a sawi a. Kumin February khan sawrkar laipui chuan ‘NITI Forum for Northeast’ tih a din a, hemi hmang hian hmarchhak state ten harsatna an neihte sut kian dan leh hma an sawn theih dan ngaihtuah thin a ni dawn a ni, a ti a. Hmasawnna ruhrel saknaa hmanruate tinghet/tichak lehzual turin steel hmang uar turin kalkhawmte chu a fuih a. Steel PSUs liante hmalakna avangin hmarchhak state-a hmun hla tak takah steel quality tha a thleng thei tawh a ni, a ti a. Mizorama steel hmanna tihsan a nih theih dan hrang hrang a tarlang a. India ramin hma a sawnna atana pawimawh tak pakhat chu steel industry a nih thu sawiin Mizoram leh hmarchhak state dangte chu steel hman tamna hmun a nih chhoh a beisei thu a sawi bawk.  

Union Minster Pu Chaudhary Birender Singh chuan MSTC Ltd hian hmarchhak state tan hian thil tum tha tak tak an nei a ni tiin thlai leh thei thar chhuahte India ram state dangten an hmuh ve ngei theih nan tan an la a ni, a ti a. MSTC chuan North-east bikah Sawhthing leh lakhuihthei online-in an zuar tawh a ni tiin buhfai, aieng thlengin online hmanga zawrh tura ruahmanna a awm thu a sawi a. Hemi atan hian MSTC Ltd leh Ministry of Development of North Eastern Region hnuaia NERAMAC (North Eastern Regional Agricultural Marketing Corporation Limited) chu an thawhdun thu a tarlang a. Nikum khan online hmanga loneitute tharchhuah lei theihna e-Rakam(e-Rashtriya Kisan Agri Mandi) chu hawn a lo nih tawh thu sawiin hemi hmang hian loneitute tharchhuah chu hmun danga awmte pawhin an lo hmelhriat dawn a ni, a ti a. Loneitute leh anmahni dawrtute inkara mi tam tak awm thin chu e-Rakam hian a titlem a, hei hian loneitute nasa takin a pui dawn a ni, a ti a. Mizoram chu agriculture leh horticulture lamah MSTC hmang tangkaiin hma a sawn theih thu a sawi a. Mizoram chu sumdawnna bikah a awmna hmunin a zir a, kawng, lei leh inkalpawhna thilah steel quality tha leh tlo tak tak hman a nih leh phei chuan ram pawnah Mizorama tharte a thawnchhuah zung zung theih tawh dawn a, hma a sawn nasa hle dawn a ni, tiin inkalpawhna tha chuan Mizoramah hmasawnna a thlen dawn a ni, a ti a. Hei hian khualzinte hipna kawngah pawh a pui hle dawn a ni, a ti a. Workshop hlawhtling tak a nih ngei a beisei thu a sawi bawk a ni.

Commerce and Industries Minister Pu H. Rohluna chuan thu sawiin  Union Minister for Steel Pu Chaudhary Birender Singh chuan Mizoram a tlawh chu lawmawm a tih thu sawiin Minister leh amah tawiawmtute chuan hun tha tak an hman ngei a beisei thu a sawi a. Hmasawnna ruhrel reng rengah steel hian hmun pawimawh tak a chang thin a ni tiin Mizoram chu hmarchhak state zingah hmasawn chak pawl a nih angin steel hman tangkai theihna Mizoram chuan a nei tam hle a ni, a ti a.  Mizoram sawrkar hnuaia ICT chuan e-procurement system an siam thu tarlangin hemi hmang hian sawrkar department thil lei leh hralh chu a tih awlsam phah hle a ni, a ti a. Sawrkar laipuiin loneituten an hman tangkai theih tur ‘e-Rakam’ an hawng chu lawmawm a tih thu sawiin hei hian online hmangin loneitute, kuthnathawkte, PSUs leh mipuite hmun khatah a hruai khawm a ni, a ti a. Heng hmalakna hi loneitute chawikanna a nih thu a sawi a. Mizoram chhunga thlai, thei tharchhuahte zawrh dan chungchangah Commerce and Industries Department chuan hma a lak thu sawiin Central PSU pahnih MSTC leh RINL hmalakna chu Mizoramin a hlawkpui ngei a beisei thu a sawi bawk a ni.  

MSTC Ltd hi kum 1964-a din a ni a, India rama e-commerce tihlarna kawngah hma la nasa ber pawl a ni. MST Ltd hnuaia e-Rakam hi state hrang hranga thlai leh thei tharchhuahte (sawhthing, thingpui fe, chini, aieng, khawizu, coffee, sandalwood, thlai chi, oil, leh a dangte) online-a lei theih tura ruahmanna a ni a. MSTC Ltd hnuaiah hian e-shopping mall awmin hemi hmang hian iron, steel leh a dangte lei theih niin a hralh theih bawk a ni. RINL hi PSU lian tak pakhat niin Andhra Pradesh state-a Vishakapatnam hmuna awm a ni a, steel quality tha leh rin tlak siamchhuaktu lar ber pawl an ni.

Workshop hi ni khat awh niin India ram hmun hrang hrang atangin mi pawimawh tak tak an kalkhawm a. MSTC Chief Managing Director, Pu B.B. Singh chuan kalkhawmte lawmna thu a sawi a. Steel Jt. Secy Pi Ruchika C. Govil chuan Mizoram in tun aia steel hmanna-a hma a sawn theihnate a sawi a. RINL Chief Managing Director Pu P. Madhusudan chuan ‘Challenges and opportunities for steel usage in the North East’ tih hmangin thu a sawi a. SAIL Director Commercial, Pi Soma Mondal chuan thu a sawi a. INSDAG Director General Pu S. Bannerjee chuan technical presentation a pe a. Zawhna leh chhanna hun hawn a ni a. MSTC Ltd Director Finance Pu AK Basu chuan lawmthu sawina in hun a khar a ni. He hunah hian Commerce and Industries Department, PWD, Rural Development Department, Horticulture leh Agriculture Department hotute leh college zirlaite leh zirtirtute an tel a ni.     

 

Attachment

  • Loading attachment...