4073/2023-2024

Aizawl, 07.03.2024: Vawiin chawhnu dar 1:00 p.m. khan Er. Benjamin L. Tlumtea chu Mizoram state aiawh member, Joint Electricity Regulatory Commission for Manipur & Mizoram atana appoint chu sawrkar laipuia Cabinet Minister for Power, New & Renewable Energy Pu R. K. Singh hmaah video conferencing hmanga rinawmna thuthiam la in lak luh a ni.

Electricity Regulatory Commission hi Ministry of Power hnuaia statutory body (quasi-judicial) niin, electricity kaihhnawih tinrengah State a thuneitu sang ber niin Electricity Act, Rules, Standard of Performance a kenkawh bakah, Regulations leh Tariff te tichhuakin Manipur leh Mizoram state tan a thawk mek a. JERC for Manipur & Mizoram hi Electricity Act, 2003 dan hnuaiah Ministry of Power, Govt. of India leh Manipur leh Mizoram sawrkar aiawh ten Memorandum of Agreement siamin kum 20 chhung atan ni 24.07.2008 khan din a ni a, agreement a tawp hnuah chuan state pahnih tan a hran ve vea din a tul dawn a ni. He commission member-te pawh hi Ministry of Power, Govt. of India atanga thlanchhuah an ni a. Mizoram leh Manipur state aiawh member pakhat ve ve awmin Chairperson hi kum tin inthlakin, tunah hian Manipur state aiawh Pu R. Thanga chu chairperson a ni mek a ni.

Vawiina Member, Joint Electricity Regulatory Commission (JERC) for Manipur and Mizoram atana lakluh tak Er. Benjamin L. Tlumtea hi Power & Electricity Department, Mizoram a Superintending Engineer hna thawk lai mek a ni a. He hna chelh tur thlanna hi All India Selection niin mi 32 in an dil a. Selection Committee in uluk taka an zirchian hnu ah Appointments Committee of the Cabinet, Govt. of India in a pawmpui leh hnu in thlan a ni ta a ni. Er. Tlumtea hian B. Tech a zawh hnuah mahni inchawm chawpin Bradley University, Illinois, USA atangin M. Tech a zo leh a. Kum 2008 khan All India Selection (DoPT), Home Ministry thlanin India-Japan Bilateral Cooperation Agreement hnuaia Japan ramah thla khat leh a chanve program ah India ai a lo awh tawh a, hetah hian khawvel ram 11 atangin mi 1 theuh thlan an ni. Kum 2019 khan Renewable Energy lamah study-cum-training in Spain leh Germany ah te a lo kal tawh bawk.

Indian Engineers Federation (INDEF), North Eastern Region ah nihna hrang hrang chelh tawhin, 2017-2021 chhung khan President a lo ni tawh bawk a, North East a Engineering hmasawnna turin hma a lo la tawh thin a ni. Power & Electicity Department Officer Association lamah hruaitu ni tawhin, Mizoram Engineering Service Association (MESA) General Secretary a lo ni tawh bakah tunah Vice President a ni mek bawk.