3776/2023-2024

Aizawl, the 12th February, 2024: Assam Rifles buatsaihin vawiin chawhma dar 10:00 khan 2 AR Gajraj Hall, Lakhimpur Battalion, Aizawl-ah Rozgar Mela/Job Fair buatsaih a ni a, he hun hi Union Minister of Law and Justice Pu Arjun Ram Meghwal chuan telpuiin sawrkar laipui Ministry of Communication hnuai Department of Post-a Branch Post Master leh Asst. Branch Post Master hna hmu thar mi 18 te hnenah Appointment Letter a hlan.

Rozgar Mela rawn hmanpuitu Union Minister of Law and Justice Pu Arjun Ram Meghwal chuan Prime Minister duh dan angin hnalak reng reng langtlang, dik leh awlsam thei ang bera kalpui a nih thu sawiin, hna hmu thar Rozgar Mela puala appointment letter hlan takte leh an chhungte a lawmpui thu a sawi a. Ram thang chak tak India rama hna hmu tharte chu ram tana innghahna an nih thu sawiin, an laka beiseina sang tak neih a ni, a ti a. Merit atanga teha tithate'n dik taka hna an hmuh theih nana hmalak chu sawrkarin a ngaihpawimawh thu sawiin, hna hmu tharte chu training tha tak neia rinawm taka hna thawk turin a chah a ni.

India-in chak taka hma a sawn zel thu leh kum 2047 ah chuan ram changkang developed country ni thei tura tan a lak thu sawiin, tun dinhmunah khawvela ram economy lian 5-na kan ni mek a, economy lian ber pathumna pawh nih thuai kan tum a ni, a ti a. India chu sector hrang hrangah khawvela hmahruaitu a nih mek thu leh hei hian sum leh pai lakluh leh ram chhung sum leh pai dinhmun siam that kawngah awmzia thui tak a neih thu sawiin, "State zawng zawngte hmasawnna tel lovin India in hma a sawn thei dawn lo a ni", a ti bawk.

Pu Arjun Ram Meghwal chuan ram chhunga Post Office-te'n hma a sawn chhoh zel thu leh tihchangtlun mek zel a nih thu tarlangin, India Post Payments Bank (IPPB) anga Post Office-te an thawh tawh avangin hna pangngai bakah banking thlengin an khawih tawh a, hemi a nih avang hian hna hmu tharte chu training tha tak buatsaih sak turin Post Office hotute a chah a. Culture vawnhim kawngah tanlak a ngaih thu pawh sawiin, Mizoram ASI neih dante ASI aiawha kalte a zawt fiah a; ASI, Assam Rifles leh Post Office hotute chu mamawh leh tul an neihte a hnena thlen hreh lo turin a chah bawk.

He hunah hian Col Mukesh Sauhta, Commandant, 2 (Lakhimpur) Battalion, 2 Assam Rifles chuan inlawmna thu a sawi a. Assam Rifles hmalakna hrang hrangte bakah Sawrkar laipui hmalakna pawimawhte a tarlang a ni.

Rozgar Mela hi sawrkar laipui ruahmanna, hna neilote tana hna siam sakna kawnga hmalakna pawimawh tak niin, hna zawngtu leh ruaitute'n awlsam zawka hma an lak ho theihna tura ruahman a ni a; hemi kaltlang hian hna hmu tharte hnenah appointment letter sem chhuah thin a ni bawk. Vawiin hian India ram chhung State hrang hranga hmun 47 ahte Rozgar Mela huaihawt a ni a; hemi kaltlang hian sawrkar laipui, State leh UT hnuaia Department hrang hranga hna hmu thar mi nuai khat chuangte hnenah appointment letter pek chhuah a ni.

Prime Minister Pu Narendra Modi chuan ram pum huap hun hman hi video conferencing kaltlangin a telpui a, thalai hna hmu tharte hnena thuchah sawiin appointment letter a sem chhuak a; hemi rual hian ram chhung hmun hrang hranga Rozgar Mela hmannaah appointment letter hi hna hmu tharte kutah hlan a ni.

Vawiin Rozgar Mela kaltlang hian Mizoramah chuan sawrkar laipui Ministry of Communication hnuai Department of Post-a hna hmu thar Branch Post Master leh Asst. Branch Post Master, an vaiin mi 18 te hnenah Union Law and Justice Minister-in appointment letter a hlan a.  Appointment letter hlante hi mipa 10 leh hmeichhia 8 an ni.