3776/2023-2024

LUNGLEI;the 12th February, 2024: Tukin zing dar 7:30 khan Venglai Traffic Point-ah “I him theih nan Traffic Rules te tha takin zawm thin ang che” tih thupuia hmangin, ‘Road Safety Month- 2024 & No Tolerance Week’ observance programme hman a ni a. District Bawrhsap leh District Road Safety Committee chairman nibawk Pi Ramdinliani chuan programme kaihruaiin, Pu Lalramliana (Papuia), Lunglei South bialtu MLA chuan khuallian niin programme a hman pui a, ‘No Tolerance Week’ hawnna ribbon a chepchat nghal a ni.

Pu Lalramliana chuan man hlauh avang chauhva Dan zawm kan ni chuan kan Motor Vehicle Act leh Traffic Rules te hian awmzia a nei thui lovang, Dan te hi keimahni himna atana zawm tura siam a ni a, Duty awm lai chauhva zawm, awm lo veleh zawm leh lo kan nih chuan Lirthei chetsualna avangin nunna hlu tak kan la inchan zel ang ti a hlauhawm hle a ni, a ti.

Superintendent of Police Pu Rahool Alwal IPS pawhin thu sawina hun hmangin, India ram state dang te ngaihtuah chuan Mizoram chu Traffic Rules zawm thatna berte zing a mi a ni na chungin, Lunglei district-ah kum 2022 khan Lirthei Accident avangin mi 2 in nunna an chan a,Kum 2023-ah erawh chuan mi 7 laiin nunna an chan a ni. Chuvangin mitinin tha takin Dan zawm I la, I fimkhur hram hram ang u, a ti.

Pu Beitlotha Nohro, DTO pawhin report pekna hun leh mipui Road safety Pledge laktirna hun a hmang bawk. Report a tarlan danin  DTO office  hian  January 1 -  December 29, 2023  chhungin Tax & Vehicle Fees atangin ? 1,99,59,517  an la lut a, Lirthei chi hrang hrang- 2214 register niin, Driving License-2315, Learner License-3623 leh Conductor License-2 pek chhuah a ni bawk. DTO chuan IRAD( Integrated Road Accident Database) Mizoram in a tarlan dan  sawiin,  15th Sept,2021--2nd Feb,2024 chhunga  Mizoramah Lirthei chetsualna vawi 372 a thleng a, mi 130 in nunna an chan a ni.Lirthei chetsual tamna ber hi Lunglei District niin, vawi 100 a thleng a ni.