2883/2022-2023 

Aizawl, the 30^th November 2022 : Vawiin tlai dar 4 khan zankhat riaka Mizoram lo zin Union Minister of State for Housing & Urban Affairs Pu Kaushal Kishore chuan Aizawl Smart City Limited hnuaia Old Secretariat Building -I a bun Integrated Command & Control Centre(ICCC) chu a tlawh a. Helai hmunah hian Deputy Chief Minister Pu Tawnluia, Urban Development & Poverty Alleviation changtu ni bawk, Urban Development & Poverty Alleviation, Aizawl Smart City Limited (ASCL), SIPMIU leh Aizawl Municipal Corporation hotute leh officials te nen meeting an nei nghal a ni.

Meeting ah hian Aizawl Smart City Limited CEO Pu Lalrothanga chuan he project hnuaia kawng hrang hranga Aizawl khawpui tihchangtlunna an kalpui mek te chungchangah presentation a nei a. Hengte hi – IT hmanga Aizawl khawpui hmun tam taka camera chi hrang hrang dah mek te, lirthei hmangte leh ke a kalte tana awlsamna an siamsak mek te, Aizawl tui semna tihchangtlun nana hmun engemaw zata RCC reservoir siam te, thli luan sewerage hna an kalpui mek, bawlhhlawh sawngbawlna an kalpui mekte leh thil dangte an ni.

Deputy Chief Minister chuan Smart City Project nakkum March-a tawp tur hun pawhsei sak turin a ngen a. Smart City hnuaia project-te hi kum 5 chhunga zawh tura tih ni mahse hripui avangin duh angin hma lakna te a chak thei loa, hei vangin  a hun taka hna te zawhfel theih a nih loh  thu a sawi a. North Eastern Region Urban Development Programme (NERUDP), SIPMIU tia hriat lar chu March 2022 khan a tawp a, mahse hei hi mipuiin kawng tam takin an chhawr nasat thu sawiin a bik takin hemi hnuaia Aizawl khawpui chhunga tui semna tihchangtlun te, Aizawl khawpui thli luanna tur sewerage system siam te leh 10 MLD Sewage Treatment Plant te chu zawhfel a la ni lova hemi atana sum mamawh belh vaibelchhe 125.35 chu AMRUT 2.0 emaw, 10 percent GBS emaw atanga ruahmansak turin a ngen a ni. 

Union Minister chuan Aizawl chu khawpui fai tak, traffic felfai tak neia a hmuh thu sawiin faina kawnga Aizawl khawpui leh Mizoram hmalakna te chu fakawm a tih thu a sawi a. Deputy Chief Minister ngenna Smart City hun pawhsei chu Prime Minister Pu Narendra Modi leh a Cabinet Minister Pu Hardeep Singh Puri te sawipuia theihtawp a chhuahpui tur thu a sawi a ni. NERUDP a sum mamawh belh chungchangah pawh a theih ang angin hma a lakpui tur thu a sawi lang a ni. Prime Minister chuan 2047 thleng Atma Nirbhar Bharat kaltlangin India chu ram ropui leh hmasawn taka siam a tum a, hemi atan hian mipuite leh sawrkar te kan thawhho a tul a. India mite chu khawiah pawh cheng ila, India khua leh tui kan ni vek a, ram hmasawnna atan leh ram ropuina atan kan theihna zawn  theuhah mitinin theihtawp kan chhuah a tul a ni tiin Sawrkar laipui leh State Sawrkar te chu tha leh zual a kan thawhho a ngai a ni, a ti.