2878/2022-2023

Sahmulphah thla ni 30, 2022: Union Minister of State for Housing & Urban Affairs Pu Kaushal Kishore chuan vawiin khan Lawngtlai tlawhin, Lai Autonomous District Council (LADC) official-te leh tlawmngai pawlte nen inkawm hona hun a buatsaih bakah, Lawngtlaia Sawrkar Laipui ruahmanna hnuaia hmasawnna hna thawh hrang hrang (centrally sponsored scheme) thlir hovin head of office-te review meeting a neihpui.

Union Minister of State Pu Kaushal Kishore hi Mizoram Urban Development & Poverty Alleviation (UD&PA) Secretary Pu Lalmalsawma Pachuau, IRS chuan lo ṭawiawmin, Lawngtlai Helipad-ah Lawngtlai Bawrhsap Pu Amol Srivastava, IAS hovin District Administration leh Police lam official-te leh Lawngtlai District BJP hruaitute'n an lo dawngsawng a ni.

Lawngtlai DC Conference Hall-a Lai Autonomous District Council (LADC) lam nena inkawm hona hun buatsaihah LADC-a Deputy Chief Whip Pu H. Lalmuansanga hovin LADC official-te'n LADC dinhmun tlangpui lo hrilhin, mamawh an neihte chu Union Minister of State hnenah hian an lo thlen a. Lawngtlaia Maxi Cab Terminal sakna tur leh project dang concept paper an theh luh chu Union Minister of State chuan a theih anga Cabinet Minister hnena a lo bawhzuisak tur thu a sawi.

Tlawmngai pawlte nena inkawm hona hun buatsaihah Union Minister of State hi Central Young Lai Association (CYLA), Lai Women Association (LWA) General Headquarters leh Lai Students' Association (LSA) General Headquarters hruaitute'n hmuin, an pawl dinhmun leh hma lak dan tlangpui an hrilhfiah bakah, mamawh hrang hrang an neihte a hnenah hian an thlen a. Union Minister of State chuan tlawmngai pawlte chu khawtlang siam ṭhatna kawnga ram innghahna leh sawrkar kutke pawimawh ber pakhat an nih thu sawiin, ṭhalaite suat mektu ruihhlo hman khawlohna leh zuk leh hmuam leh zu dona kawnga theih tawp chhuah chhunzawm zel turin a chah a; LWA-in HIV positive-te enkawlna hmun dinna tur project an siam te, LSA-in New Delhi-a Students' Hostel sakna tur ram an dilna leh Mizorama ADC-te dinhmun ṭha zawk pe tura an ngenna te chu a ṭul anga bawhzui a tum thu a sawi a ni.

State sawrkar hnuaia department official-te nena Lawngtlai DC Conference Hall-a review meeting buatsaihah Bawrhsap Pu Amol Srivastava chuan Lawngtlai District dinhmun tlangpui leh District chhunga sawrkar hma lakna langsar zualte report pein, Lawngtlai District UD&PA Department hma lakna tar lanna video tawi thlir ho a ni a. Union Minister of State Pu Kaushal Kishore chuan Lawngtlai District hmasawnna atana department hrang hrangte hma lakna chu fakawm a tih thu sawiin, sawrkarin mipui hamṭhatna tur ruahmanna ṭha tak tak a duante mipuiin a nih dan tur taka an chhawr theih nan mahni hma zawn ṭheuhvah ṭhahnem ngai taka thawk zel turin official kal khawmte chu a chah a ni.

Hemi hnu hian Union Minister of State Pu Kaushal Kishore chuan Aizawl panin helicopter-in Lawngtlai hi a chhuahsan leh nghal a ni.