2877/2022-2023

Champhai, the 30th November, 2022: Champhai khawpui kianga luang Keilungliah lui khuah mek, peihfela hawn anih hnua a enkawl zui zel kawnga hmalatu tura Sawrkarin a din, 'District Level Committee on Post Completion Management & Maintenance of Dam Reservoir cum Recreation Centre at Keilungliah' chu vawiin chawhnu dar 1 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Chairman Pu James Lalrinchhana chuan Keilungliah tuikhuah chu Champhai nghahfak leh rohlu tak, atak ram hmuh chhoh mek zel anih thu sawiin, duat leh thiam taka enkawl a tul avangin a enkawltu tur mumal tak siam a ni a, mamawh leh tul angte ngaihtuahho thin a ni, a ti a. District mipuite chu district tana rohlu enkawl kawngah neitu thinlung pua dan leh dun siamte ngaipawimawh turin a chah a ni. Line Department hrang hrangte leh khawtlang inkarah thawhhona tha a awm phawt chuan hlawhtling taka enkawl a nih theih thu a sawi bawk.

He hunah hian Member Secretary Pu ZD Dengthuama, EE, PHED Champhai WATSAN Division leh Pi R.Lalnunkimi, DUDO Champhai te hnen atangin tuikhuah cheibawl nana department hmalaknate ngaihthlak a ni a. Pu Vanlalmuanawma, SDO PHED Champhai hnen ațangin planning zone 7 a thena hmalak theih dan tur hrang hrangte zirchianna leh sawifiahna powerpoint presentation kaltlanga ngaihthlak a ni bawk. 

Thutkhawmah hian AMRUT 2.0 kaltlanga UD&PA Department-in Champhai khawpui tana sum a ruahman cheng nuai 102 atanga Keilungliah tuikhuah cheibawl nana hmalakna tur fund cheng nuai 51 dah tawh, tangkai taka hman anih theih nana rawtna awmte sawiho niin pawm a ni a. Line department hrang hrang atanga rawtna awmte leh hmalak theihnate sawiho a ni a. Keilungliah tuikhuah leh avelte tangkai leh mumal zawka cheibawl nana plan & estimate-te December ni 9, 2022 thlenga peihfel hman nise an ti a, DPR siam tur pawh sawiho niin ruat a ni a. December ni 15, 2022 atangin tlawhtute tan luh man lak tan nise tih a ni a. Puitlingah Rs 20/-, naupangah Rs 10/- , two wheeler Rs 20/-, three wheeler Rs 30/- leh four wheeler Rs 50/- te lak tur a ni ang. Keilungliah-ah dan phalloh sawrkar khap thilte lakluh leh Sangha man phalloh anih thu tarlan a ni bawk.

Ruahman dan chuan power lakluhna, Island, a hungna, tlawhtute chawlh hahdamna, hnawm sawngbawlna, tui thianghlim in tur, gate, floral bed, community toilet, steel cable suspension bridge, gazebo, parking area leh tul dangte siam tum a ni a. Tuikhuaha bawlhhlawh leh leinawi lut tur dan nana hmalak tulte ngaihtuahho a ni bawk a. District Level Committee chuan Keilungliah tuikhuah tlawhtute chu bawlhhlawh paih mai mai lova faina ngaipawimawh theuh turin a chah nghal bawk a ni.

District Level Committee on Post Completion Management & Maintenance of Dam Reservoir cum Recreation Centre at Keilungliah, Champhai thutkhawm tum thumnaah hian Executive Vice-Chairman Pu C.Lalhmachhuana, SE, PHED Champhai WATSAN Circle; Member dangte leh sawm bikte an tel a ni.