2876/2022-2023

Champhai, the 30th November, 2022: Special Assistance to States for Capital Investment (SASCI) 2022-2023 kaltlanga cheng vaibelchhe 13.11 senga Champhai to Zokhawthar World Bank Road, Melbuk leh Zokhawthar inkar Vawmkawlui Box Culvert lei chim leh lei che avanga he kawngpui kaltlang theih loha awm mek cheithat dan tur chu tukin khan Environment, Forest & Climate Change (EF&CC) Minister Pu T.J. Lalnuntluanga, Champhai South bialtu MLA hovin enfiah a ni.

Minister Pu T.J. Lalnuntluanga chuan Mizoram Sawrkarin Indo-Myanmar Border Trade a ngaihpawimawh thu leh tihchangtlun nana hma a lak zel thu sawiin, a bawhzui nan Sawrkar laipuite dawr leh berawn chung zelin hmalak a ni a, Zokhawthara Border Trade tihchangtlunna kalpui chhoh mekah 'Upgradation of Land Custom Station at Zokhawthar Project' cheng nuai 1,500 hmangin Animal Quarantine, Plant Quarantine, Immigration Check Post changtlung tak, Staff qtrs. leh rest house-te siam mek a ni, a ti a. Heng bakah hian inkalpawhna kawngte pawh ngaihpawimawh anih thu sawiin, bialtu MLA anih anga theihtawp a chhuah thin thu leh harsatna Chief Minister hnena thlente a buaipuina tur sum ruahman a ni chu lawmawm a tih thu a sawi a. Tul angte buaipui fel anih veleh hna tan nghal chat a tul thu sawiin, fur ruahtui tlak hma leh hnathawh awlsam hunlaia hmalak anih theih nana theihtawp chhuah zel tum anih thu a sawi bawk.

Hnathawhna tur hian Sawrkar laipui Ministry of Finance (MOF), Department of Expenditure, Public Finance-States Division atangin SASCI fund cheng vaibelchhe 13.11 sanction a ni a, a tul angte bawhzuia tihfel anih hnuah hna tan tum a ni a. Hemi kaltlang hian Vawmkawlui Box Culvert lei dawh chim siam that, lei che leh tawlh avanga kawng chhiate siam that tum a ni a. Implementing Agency chu PWD Mizoram hnuaia PIU World Bank a ni ang.

Pu T.J. Lalnuntluanga chuan World Bank Road atanga Melbuk khawluhna tawntirh atanga khaw chhung kawng siam that dan turte, Melbuk Field leh Zokhawthar Field tihchangtlun dan turte bakah heng khaw pahniha electric power tha zawka pek dan turte Offical leh khawtlang hruaitute nen an enfiah a. Heng bakah hian New Champhai - Zotlang panna World Bank Road phaizawl pheia lirthei accident thlen zinna leh nunna tam tak chan tawhna hmunte a tlawh a, mipui veivakte him zawkna atana hmalakna kalpui mekte a enfiah a ni. Helai hmunah hian bialtu MLA hmalaknain District Administration, PWD, Police, YMA, BRTF leh VC te'n November 19, 2022 khan hmalak dan turte an lo zirchiang tawh a, hemi bawhzui hian himna tura tul hrang hrang rumble strip, accident barrier, cautionary board, catch eye delineator leh reflector-te siam mek a ni.

Environment, Forest & Climate Change Minister Pu T.J. Lalnuntluanga chuan National Highway No 6, Khawzawl to Champhai kawng siamtu Shri Balaji Construction Ltd. aiawh pawh kawmin kawng siam kalpui mek hmalak dan leh environment nghawng theih dante a sawipui a. Champhai District Level Monitoring Committee enfiahna report, Chairman Pu James Lalrinchhana, District Bawrhsap-in a sawifiah a. Forest Minister chuan hmalaknate tha thawkhat leh environment nghawng nasa lo thei ang bera kalpui a ni chu lawmawm a tih thu a sawi a. Company hotute chu an hmalak lehzelna turah hna tlo leh tha, hun bituk chhunga zawh hman tum tur leh environment tana pawi tur thlen lo tura thawk turin a chah a ni.

Minister Pu T.J. Lalnuntluanga hi District Bawrhsap Pu James Lalrinchhana; Pi B.Vanlalhruaii, Sr. EE, PWD; Pu H.Lalhruaitluanga, DSYO; Pu Jim Elliot Sailo, EE, PWD; Official dangte; Shri Balaji Construction Ltd. hotute leh khawtlang hruaitute'n an tawiawm a ni.