Nizan thimhlim ah khan Mizoram rawn tlawhtu, Pu Sudarshan Bhagat, Union Minister of State for Rural Development chu Raj Bhavan ah lenglut in Governor Lt Gen Nirbhay Sharma (Retd.) nen an inkawm a.

Governor Lt Gen Nirbhay Sharma (Retd.) hnenah Mizoram a rawn tlawh chhan te hrilh in Kolasib District a IAY leh Rural development hnuaia hmalakna hrang hrang te a en dik thu Pu Sudarshan Bhagat chuan a sawi a. Kolasib RD block hrang hrang ah hmalakna kalpui tak te chu tha a tih thu sawiin Mizoram sawrkar, Kolasib Bawrhsap leh official ten an lo dawnsawn dan chu lawmawm a tih thu a tarlang.

State lian a nih loh avangin Mizoram chuan central tanpuina sum a mamawhna a nasa a, chung tanpuina sum lo kal tur te pawh chu a hun taka dawn hman a pawimawh thu Governor Lt Gen Nirbhay Sharma (Retd.) chuan Union MOS for Rural Development chu lo hrilh hriat in central fund lo kaltur te pawh a hun taka state in a hmuh theih nana theihtawp lo chhuah turin a ngen a ni. An inkawmna ah hian ruahtur khawl chungchang bakah organic farming hmanga Mizoram economy tih hmasawn dan tur leh hmachhawp pawimawh tak tak an sawi dun bawk a ni.

Pu Sudarshan Bhagat, Union Minister of State for Rural Development hi Lt.Col. Z.S. Zuala (Retd.), MLA, Parliamentary Secretary, Rural Development Department, Pu Lalhmingthanga, Secretary, RD leh official ten an rawn tawiawm a ni.