Zankhat riaka Mizoram lo zin Sawrkar Laipui Ministry of Road Transport & Highways, Shipping leh Chemicals & Fertilizers enkawltu Minister of State Pu Mansukh Mandaviya chuan vawiin chawhma khan National Highway NH-44A (Rawpuichhip – Mamit Road) a hnathawh kal mek a hmunah a enfiah. Minister hi Er K. Lalsawmvela, CE, PWD (Highways) leh PWD official dangte bakah he kawng siam contractor Gayatri Projects Ltd hotuten an tawiawm a ni. 

Union Minister of State Pu Mansukh Mandaviya chuan "Special Accelerated Road Development Programme in North East (SARDP-NE)" hnuaia NH-44A hnathawh kal mek chu sawrkar laipuiin a ngai pawimawh takzet a ni a ti. Central Minister chuan PWD Department hotute leh Gayatri Projects Ltd aiawhte kawmin, NH-44A a kawng laih meka hnathawh chak zawka kalpui a nih theih nana hmalak dan tur te an sawihova, harsatna an tawh hrang hrang te sutkian dan tur an rel ho bawk. Pu Mansukh Mandaviya chuan sawrkar official-te leh a hmuna hnathawktu contractor-te chu thawhhona tha tak nei zel turin a fuih bawk. Hmasawnna ruhrel chungchangah sawrkar laipuia thlen tur Detailed Project Report (DPR) te uluk leh fel taka ruahman a pawimawh thu Central Minister hian a tarlang bawk a ni. 

Union State Minister-in a hmuna a enfiah kawnglaih hna kal mek “Widening to 2 Lane with geometric improvement and re-alignment of NH-44A in Mizoram State” (kawng zauh leh sial that) hi Mamit District a Lengpui atanga Tripura ramri a Langkaih Lui thleng niin, Tripura-a NH-44A a thlunzawm dawn a ni.  He Project Road Sector hi 103.618 km-a thui a ni. He kawng hi Mizoram leh Tripura inthlunzawmna pawimawh leh tangkai tak a ni dawn a ni.