Mizo zinga Ex-Serviceman upa ber pawl Sub Maj (Hony Capt) R.Lawma (1921-2017) vawiina boral chu Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan a uizia a lantir a, a hmingin Sunna lehkha thawnin a ruang chungah pangpar a dah a. Karleh Thawhtanni khian an inah lengin Capt R.Lawma chhungte a ral dawn bawk a ni.

Sub Maj (Hony Capt) R.Lawma hi 24 July 1921 khan Venghlui, Aizawl-ah a piang a. Kum 17 leh chanve a tlin khan Assam Rifles Commander khan sipaiah a la lut a, Indopui II-na hunlai 1941-ah 1st Assam Rifles-ah a awm a ni. Kum 1946-ah Paratrooper Training School Royal Air Force, Chaklala Rawalpindi (tuna Pakistan-a awm ta) hmun atangin Paratrooper a tling ta a, India-a Paratrooper hmasa ber Lt Col AG Rangaraj, MVC hnuaiah a thawk nghe nghe hman a ni. March 1947-ah 2nd Airborne Division-ah a lut a, Karachi-ah an training a, April 1947-ah Rawalpindi hmuna Paratrooper Training School-ah Canadian Air Force hnuaiah Operational parachutist Training chu tha takin a zo leh a ni. Korea War a chhuah takah chuan chhungte kalsanin Agra Airport-ah thlawhtheihna atanga Supply Dropping & Air Despatch Course a zir zo leh a; amaherawhchu refresher training an neih laiin a kheimit ruh a tihpelh avangin indonaa kal lovin Military Hospital, ramgarh-a a duty ta zawk a ni.

Parachute-a vawi 51 atanga vawi 99 zuang thlate hi ‘Golden yellow Wing’ pek an ni thin a, Capt. R.Lawma pawhin vawi 75 lai a zuanthlak avangin he chawimawina a dawn bakah ama Unit 60 Para Field Ambulance chuan shield mawi tak ‘Silver Parachute’ a hlan nghe nghe a ni.