Vawiin ah khan zan khat riak a Mizoram rawn tlawh tu Union Minister Of State(Independent Charge) Pu Santosh Kumar Gangwar chuan Ministry of Textiles hnuaia weavers’ Centre(WSC), ZOHANCO Building, Lily Veng, Chaltlang hawng in Ministry Of Textiles hnuai a mi tho, Apparel & Garment Manufacturing Centre(AGMC), Industrial Growth Centre ramchhung, Luangmual a sak mek lungphum khuh hawnna Tourist Lodge, Chaltlang ah a hmanpui.

A vawi khatna atana Mizoram rawn tlawhtu Pu  Santosh Kumar Gangwar chuan WSC leh  AGMC chu Mizo thalaite tana themthiamna nasa tak petu, eizawnna siamsaktu leh Mizoram tana sum tamtak  hun reilote chhunga thawk chhuak tu a ni dawn a ni a ti a. Prime Minister Pu Narendra Modi in India ram pumpui hmasawnna a duh a, chumi atan chuan a kaihhruai Ministry pawhin nasa taka hna thawkin North East States te hmasawnna tur programme phei chu a ngai pawimawh zual a ni a ti. AGMC- puantahna leh thawmhnaw siamna hmunah hian hnathawktu 1200 atanga 1500 inkar chhawr an ni anga, heng hnathawktute hamthatna tur leh an fa te healthcare thlengin ruahmanna tha tak siam sak  a ni ang a ti a.  Pu  Santosh Kumar Gangwar chuan India thenawm ram China ah chuan mipui tam tak tel theihna Industry avanga hlawkna nasa tak a awm tawh thu sawiin India pawh in schemes tha tak tak kalpui mekin nakin lawk ah chuan China hi kan la tluk thei dawn a ni a ti. Sawrkar in schemes thatak tak siam mahse hnathawktu ten rinawm taka an thawh a ngai a rinawmna leh taihmakna hlawhtlin nan a pawimawh ber a ni  ti a sawiin Sawrkar pawh in lang tlang takin schemes a siam reng reng hi a kalpui zel ang a ti.

Union Minister hnenah hian Industries Minister Pu H.Rohluna chuan Mizoram tana Industries huanga rahbi chhinchhiah tlak tak rawnsiama nih tak avangin lawm thu a hrilh a. He hmalakna hian hna hmulo te tan hna tam tak a siam dawn bakah Mizoram tan sum tam tham tak a la thawh chhuah ngei a beisei thu a sawi a . A sawi zel na ah Industries Minister chuan Mizoram in Central Schemes te hi tha takin a kalpui thin a, schemes kalpui lai thenkhat erawh chu Central atang sum rawn pek chhuah tlai avanga a buai deuh thin thu sawiin Industries hnuaia Schemes an kalpui mek a sum hmuh tur la tangkhang te pawh rawn chhuah thuai anih theih nana hmalakpui turin Pu  Santosh Kumar Gangwar chu a sawm a ni.

Thusawitu dang Textiles Secretary Dr. S.K. Panda chuan mihring mamawh pawimawh ber zinga mi thawmhnaw siamchhuahna Mizoram in a nei tur chu lawmawm a tih thu sawiin heng puantah khawl te hian nasa takin Mizo puantah Quality a tih that dawn bakah Mizoram thawmhnaw siamchhuah nasa tak in a pung dawn a ni a ti a. Mizo thalai zingah Designer tha tak tak an awm tan tawh a, heng mi te hian Mizoram a khawlpuantahna hmun din mek hi hlawk leh zuala hman tangkai tum se a that tur thu a sawi a ni.

Building unit pathum  Sqm 1380 zela lian awmna, AGMC sak hna  hi Ministry of Textiles  chuan  Rs. 1585 lakhs in NBCC a thawh tir a, October, 2015 ah khian he building hi sak zawh beisei a ni.  Vawiin tlai ah vek  khan Union Minister hian Governor  Lt General (Retd) Nirbhay Sharma  leh Chief Minister Pu Lal Thanhawla  an chenna ah a kawm nghal a ni.