632/2025-2026
Dated Aizawl the 28th May, 2025 : Vawiin chawhnu khan Pi Savitri Thakur, Union Minister of State for Women & Child Development (WCD) hovin Mizorama Women & Child Development hnuaia sawrkar hmalakna hrang hrang thlirletna hun chu Aijal club-ah neih a ni a. He hun hi Pi Lalrinpuii, Minister, WCD chuan kaihruaiin, Pi Zoramthangi Chhangte, Director, WCD, Pi Flora Laltanpuii, Deputy Director leh Pi Amy Lalrinpuii, Principal Programme Manager-te chuan PowerPoint hmangin WCD hnuaia Mizorama sawrkar hmalakna hrang hrangte an tarlang.
Pi Savitri Thakur, Union Minister of State for Women & Child Development chuan Women & Child Development kaltlanga Mizorama naupang leh hmeichhe venhimna, hriselna leh dinhmun chawikawng tur an hmalakna hrang hrangte chu lawmawm a tih thu a sawi a. Chutih rual chuan Anganwadi Centre, kawphetha nen a la thlunzawm loh engemaw zat awm te, AWC 400 chuang Saksham AWC-a hlan kai la ni ve lo te leh Nari Adalat kalpui tan la ni lote chu chakzawk a thawktuten an bawhzui a tul thu a sawi a. AWC thawmthatna tur leh thawktu lak belhna tur ruahmannate chak zawk a buaipui tur a chahin Sawrkar laipui chuan tanpui an inhuam reng thu a sawi bawk a ni.
Hun kaihruaitu Minister Pi Lalrinpuii chuan Women & Child Development hmalakna hrang hrang chhinchhiah leh thehluhna kawngah khawl leh software avangin thawktuten harsatna an tawh thin thu a tarlang a. Heng harsatnate hi a rang lam a chinfel a nih theih nan Minister of State for Women & Child Development hnen ah hian a thlen nghal a ni. Pu Pankaj Shrivastava, Joint Secretary, Ministry of WCD chuan naupang leh hmeichhe venhim leh an dinhmun chawikan kawnga Mizoram state chhunga Women & Child Development leh Law & Judicial Department thawhhona chu entawntlak a tih thu a sawi.
WCD thawktute hmalakna thlirletna hun neih ah hian Saksham Anganwadi hnuaia hmalaknate, POSHAN 2.0 hnuaia hmalaknate, Mission Shakti hnuaia hmalaknate thlir ho a ni a. Mission Vatsalya hnuaia hmalakna thenkhat pawh sawi ho a ni. Saksham Anganwadi kaltlanga Integrated Child Development Scheme (ICDS) hnuaiah hamthatna dawng naupang kum 6 hnuai lam 1,05,295 an awm a, naupai leh nu hnute pe lai 10,414 an awm a, hmeichhe tleirawl kum 14-18 inkar hamthatna dawng 18,775 an awm mek a ni. Anganwadi Centre (AWC) 629 ah kum 2024-25 chhung khan tui in tur thianghlim an neih theihna turin ruahmanna saim a ni a, AWC 203 ah inthiarna felfai siamsak ni bawkin, AWC 1088 chu Saksham Anganwadi Centre a hlankai tura thawmthat mek an ni.
POSHAN 2.0 hnuaiah hian naupang thanglai ten hriselna tha an neih theih nan an mamawh ang tawk thisen thianghlim an neih a tul zia zirtirnate, ei leh in tha inpek pawimawhzia zirtirnate Mizoram hmun hrang hrang ah kalpui a nih dan tarlan a ni a. Mission Shakti hnuaiah hmeichhe dinhmun tleute, lei rem an rah ve theih nana inkaihhruaina hmun, One Stop Centre (OSC) pawh Mizoram district 8 ah din tawh a nih thu leh district thar 3 bakah Aizawl leh Kolasib a din belh tur a nih thu tarlan a ni. Hmeichhe chunga hleilenna leh harsatna thlenna tur ‘Women Helpline’ ah hian 2024-25 chhung khan phone call 10,637 dawn a ni a. OSC ah hmeichhe enkawl 1,203 an awm bawk a ni. WCD hmalakna thlirletna hun neihna a tarlan danin Mizoramah Children’s Home 39, Observation Home 11, Observation Home cum Special Home for Girls 1, Special Home 2, Specialised Adoption Agency 13 leh Place of Safety 1 a awm mek a. Heng hmunahte hian naupang enkawl lai 1,598 an awm mek a ni.
He hunah hian Women & Child Development-a thawktute chuan department kaltlanga hamthatna dawngtute leh hmalakna hrang hrang sawt leh zuala kalpui a nih theih nan sawrkar laipui atanga fund a hun taka an dawn a tul thute, Siaha, Kolasib, Mamit, Aizawl, Serchhip, Lawngtlai-a Observation Home hungna siam a tul thu leh, harsatna bik nei naupang enkawlna tur hmun leh mithiam mamawh a nih thu an tarlang bawk a ni.
