1102//2023-2024

Champhai, the 11th July, 2023: Mizoram tlawha cham mek Union Minister of State for Agriculture & Farmers' Welfare Pi Shobha Karandlaje chuan vawiin chawhma khan zankhat riak turin Champhai a thleng.

Union Minister of State for Agriculture & Farmers' Welfare Pi Shobha Karandlaje hi Champhai Helipad-ah District Bawrhsap Pu James Lalrinchhana, SP Pu Lalrinpuia Varte leh Official dangte'n an lo dawngsawng a. Hemi hnu hian Circuit House Champhaiah Sawrkar Department hotute leh khawtlang hruaitute'n lo dawngsawngin, Circuit House Conference Hall-ah Sawrkar hmalakna leh tul dangte thlirho a ni.

Pi Shobha Karandlaje chuan Sawrkar laipui scheme pawimawh tak takte'n khua leh tui, a bik takin a tinzawn leh dawng thei tura ngaihte hnen a thlen kim theih nana tanlak tlan a tul thu sawiin, hei hi Prime Minister duhdan pawh a ni, a ti a. Department hrang hrangte inkarah thawhhona tha vawnnun tlat a pawimawh thu sawiin, ram pum hmasawn turin India ram hmun hrang hrangah hmasawnna a thlen a ngai a ni, a ti a. Official-te chu an department kaltlanga scheme awmte zirchianga hre bel tur leh a nihna ang tur taka kalpui a nih theih nana tanla sauh sauh turin a chah a. NE State te'n scheme pawimawh hrang hrangah 90% subsidy an dawng chu vanneihthlak a tih thu sawiin, hengte hi hriaa tha taka scheme hlenchhuah a tul thu a sawi a. CSS khawih Department hotute chu harsatna awmte leh bawhzui tul angte ziaka a hnena thlen tura chahin a tul angte Sawkar laipui lamah lo ngaihven sak a tum thu a sawi a. Loneitute chu India ram ei leh bara chawmtu an nih avangin sarkar laipuiin a ngaipawimawh gle a ni, a ti bawk.

He hunah hian Champhai District Bawrhsap Pu James Lalrinchhana chuan Champhai District mipuite aiawhin Union Minister of State for Agriculture & Farmers' Welfare lawmna thu a sawi a; Champhai District chanchin kimchang, Centrally Sponsored Scheme kalpui meka hmasawnnate, hmalakna kal mekte leh hmachhawpte powerpoint presentation hmangin a tarlang a. SP Champhai Pu Lalrinpuia Varte in security chungchang report a pe bawk.

Union Minister State for Agriculture & Farmers' Welfare chuan vawiin chawhnu dar 2:30 khan Champhai leilet zawl tlawhin Farmer Interest Group member-te a kawm a. Leilet enkawltute chuan Champhai leileta kumtluana buh leh thlai dangte chin a nih theih nana tui hnianghnar zawk neih theih nana water harvesting dam siam te, Tuipui lui lian avanga harsatna hrang hrang awm thei leh a venna tur siam chungchangte leh leitha duh khawp hman tur a awm theih nana hmalakpui turin Union Minister of State for Agriculture & Farmers' Welfare hi an ngen a. Union Minister chuan loneitute thawhrimna chhuanawm a tih thu sawiin, an tana Sawrkar laipuiin hamthatna a duan an chhawr tangkai dante a zawtfiah a. Line Department Official-te chu leilet neitute harsatna hre renga DPR siama sawrkar laipuia thehlut turin a chah a ni. He huna tarlan a nih danin PM KISAN Scheme hnuaiah Champhai District atangin July ni 3, 2023 thleng khan inziaklut 11,416 awmin 10,585 ten hamthatna an dawng tawh a ni.
Hemi hnu hian Pradhan Mantri Matsya Sampada Yojana (PMMSY) kaltlanga cheng nuai 15 senga Sangha chi tharchhuahna 'Construction of Freshwater Finfish Hatchery Unit', Tlangsam ami tlawhin Sangha note tharchhuahte leh hmunhmate a enfiah a. Champhai Grape Growers Society-te enkawl Champhai Winery, Tlangsam tlawhin Grape sawr bultanna hun a hmang a. Sawkar laipuiin food processing industry a ngaihpawimawh thu sawiin, Champhai leh Hnahlan Grape Winery hotute thil thlente pawh a tul anga lo ngaihven zui a tum thu a hrilh a ni.

Vawiin tlai dar 4:30 khan Non Lapsable Central Pool of Resources, NLCPR (DoNER) sum cheng vaibelchhe 19.88 senga PHE Department siam Keilungliah tuikhuah, April ni 1, 2023 a Union Home Minister-in a hawn chu tlawhin a enfiah a. He hunah hian Keilungliah tuikhuah enkawl tura Sawrkarin a din, District Level Committee on Post Completion Management & Maintenance of Dam Reservoir cum Recreation Centre at Keilungliah hmalaknate hrilhfiah a ni a. A enkawlzui, cheimawi leh Champhai tana tui mamawhna phuhruk a nih theih nana project siamte hrilhfiah a ni bawk.