2760/2022-2023 

Aizawl the 22nd November 2022 : Vawiin khan Environment, Forests and Climate Change changtu Union Minister of State Pu Ashwini Kumar Choubey hovin Mizoram State EF&CC Minister Pu TJ Lalnuntluanga, Forest Department leh Mizoram Polution Control Board hotuten Chief Wild Life Warden Office, MINECO ah meeting an nei.

Minister Pu TJ Lalnuntluanga chuan sawrkar laipui Forest hotuten Mizoram an rawn tlawh chu lawmawm a tih thu sawiin harsatna hrang hrang an tawh mek te Union Minister hnenah hian a thlen a. Hmasawnna hna thawh kawnga harsatna thlentu Forest Clearance chungchangah EF&CC Department thawktute chuan a rang thei ang bera hma an lak thu leh Parivesh Portal a harsatna a awm thin avanga a hun takah leh rang taka Forest Clearance pek a nih loh thin thu a sawi a, hemi sukiang tur hian Ministry lamin an tih tur ti ve zung zung turin a ngen a. IFMIS ah sawrkar a luh mek avangin sum leh pai chetvel dan inthlakthlengin a nghawng CSS-a Mizoramin sum a hmuh tur a hun taka a hmuh theih loh thu leh technical thilah harsatna an tawk tih a sawi a. Heng harsatna hi chingfel a, hmasawnna hnathawhna tur sum te a hun taka release turin a ngen a ni. State chhunga sawrkar laipui scheme hrang hrang kalpui mekah heng project hnuaia thawktuten a hun taka hlawh an dawn theih nan hma la turin Pu TJ Lalnuntluanga chuan a ngen a. Green India Mission chungchangah he Mission hian District 4 huamchhunga forest division 5 chauh a huam mek tih sawiin Mizoram pumpui tuam thei tur khawpa he Mission hi tilian turin a ngen bawk a ni. 

Union Minister Pu Ashwini Kumar Choubey pawhin thu sawiin Mizoram chu nuam a tih thu te, India ram state zingah forest nei zau ber an nih angin eco-tourism lamah hmabak eng tak an nei nia a hmuh thu a sawi a. Mizoram leh North East State te chu Prime Minister Pu Narendra Modi-a’n a ngaih pawimawhzia tarlangin Mizoram State chhunga sawrkar laipuiin hmasawnna hna a thawh mekah harsatna an tawhte a hmunah hmuhpuiin Mizoram tan theihtawp a chhuah tur thu Union Minister hian a sawi a ni.  Pu Ashwini Kumar Choubey chuan Carbon credit leh Eco-tourism ah te, Eco-Task Force din a nih theih nan te project thehlut tur leh Jal Shakti hnuaiah lui humhalhna tur project thehlut turin Mizoram Sawrkar a hriattir a. EF&CC hnuaiah IFS post ruakte hnawhkhah a nih theih nan Sawrkar Laipuiah rawtna thlen turin a hriattir bawk a ni. 

Vawiin meeting-ah hian Mizoram Polution Control Board Chairman Pu Rosiama Vanchhawng chuan presentation pein Mizoram dinhmun tlangpui a sawifiah a. Additional PCCF Pu RS Sinha pawhin EF&CC hmalakna sawifiahna hun a hmang bawk a ni. 

Meeting hi Deputy Conservator of Forests Pu MZ Singson chuan a kaihruai a. PCCF Pu R.K. Singh chuan kalkhawmte lawmna thu sawiin Conservator of Forests (Wildlife), Chief Wildlife Warden ni bawk Pi Lalrammawii Sailo chuan lawmthu sawiin hun hnung a khar a ni.