Vawiin khan tunlai thiamna changkang tak Video Conferencing hmang tangkaiin Union Minister of State Pu Sachin Pilot chuan Aizawl BSNL Bhawan tur lungphum phumin, Industries Department hnuaia Computer Aided Designing (CAD) Training Centre a hawng a ni.

Union Minister hian BSNL Convergence Hall, Kolkata atangin Aizawl BSNL Bhavan lungphum chu video kaltlangin a lo thlir a. Thu a sawiah building sak thar tur chu a hun taka peihfel leh a hma thei ang bera mipuiin an chhawr tangkai a duh thu te, hmarchhak bial chu tlangram chhengchhia ni mahse technology lamah hmanrua thar leh changkang ber bera thuam tum a ni, a ti.

BSNL Bhawan hi DTO Compound, Raj Bhawan chhimlam Gate ep chiah a awm tur a ni a. Chhawng 6-a sak tur he building hi cheng vaibelchhe 2.44 senna tur a ni ang a, kum 2 chhunga zawhfel tura beisei a ni.

Hemi zawhah hian Minister chuan video conferencing hmang bawkin Computer Aided Designing (CAD) Training Centre chu a hawng nghal a. Information Technology hi a bik takin thalaite tan malsawmna a nihzia sawiin Pu Pilot chuan hnam thil pawh thalaiten tuipui a, tih hmasawn dan turah an thiamna te hmangin eizawnna ngelnghet tak an neih phah tur chu a lawmawm hle a ni, a ti. Tunlai khawvelah IT hi eizawnna kawng engah pawh tangkai leh tichangtlungtu a nih tawh avangin thalaiten an chhawr nasa bik em em a, ram hmasawnna tur chuan thuneitute leh thalai zawkte pawh an mamawh leh duh dan te inngaihchan leh inrawn fo a fuh ber ang, a ti bawk.

Computer Aided Designing (CAD) Training Centre hi August 2010 atanga din tan tawh a ni a, zirlai 50 chuangin course an zo tawh a, a bik takin puan taha eizawng te tan tangkai leh zual tura beisei a ni.

Vawiina Union Minister thil hawn programme-ah hian SP Singh, Chief General Manager, NE I Cricle, BSNL, Shillong; P. Sitaram Raju, General Manager, BSNL, Aizawl; Pu Lalhmachhuana, DGM, BSNL, Aizawl; Industries Director Pu Zothankhuma, Jt. Director Pi Lalrodingi leh C-DAC Kolkata official engemawzat an tel a ni.