Vawiin chawhnu khan zan khat riaka  Mizoram rawn tlawhtu Union Minister for Statistics & Programme Implementation Pu D.V. Sadananda Gowda  chuan Secretariat Conference Hall-ah Planning Minister Pu Lalsawta leh official te kawmin scheme leh Central Sectoral project pawimawh tak kalpui mek te a sawipui. 

Meeting  tan a nih veleh Union Minister for Statistics & Programme Implementation Pu D.V. Sadananda Gowda chu Mizoram Planning Minister Pu Lalsawta chuan lo lawmin Mizoramin hmasawnna kawnga ke a pen dan tlangpuite tawi leh kimchang takin  sawi hmasa a. Hemi hnu hian Union Minister kaihruaina in Meeting chu chhunzawm a ni. Union Minister Pu D.V. Sadananda Gowda  chuan Mizoram chu nuam a tih thu sawiin India hmarchhak state zinga hmun ralmuang a ni a ti. Mizoramah  Members of Parliament Local Area Development Scheme (MPLADS) chu tha takin kalpui a ni tih a data in a lo hmuh bakah kalkawng dung thui lo te a rawn zawh chhoh pawhin hna tha tak tak thawh a ni tih a hmuh thu te sawiin he review meeting-a tel,  Mizoram Lok Sabha MP Pu CL Ruala chu a lawmpui tih a sawi a. MPLADS Mizoramin a kalpui dan chu state dangte tan entawntlak, ‘Role Model’ a ni a ti.  Pu D.V. Sadananda Gowda   chuan Support for Statistical Strengthening (SSS) Scheme hmanga Planning & Programme Implementation Department hnathawh dan chu a tha a tih thu sawiin Central duhdan anga Real Time Data, Department tin ten an hman theihna turin state a Economics & Statistics Department te pawh an tan sauh sauh a ngai a ni a ti a. Data rintlak leh thar hlam(realtime Data) chu hmasawnna tura sawrkar ti penchaktu – planning, implementation leh economic policy innghahna bakah langtlang sawrkar siamna atan hmanraw pawimawh tak a ni a ti. Central Sawrkar chuan Mizoram mamawh  pawimawh ber  chu inkalpawhna leh inthlunzawmna tha zawk a ni tih a hriat thu a sawi a. Railways hmalakna tihsukuk leh tihkhawtlai a ni fo thin chu pawi a tih thu  sawiin a tuar ber tu chu Mio mipui te an ni a; Rel kawng phah meka harsatna a lo thlen changin state sawrkar leh Central Sawrkar inpawh tlang taka an thawh chhunzawm zel a ngai a. Rel kawng  siam chuchangah leh National Highways siam mekah te  Central sawrkar chuan Mizoram sawrkar harsatnaah te a sutkian dan zawnpui turin theihtawp chhuah a inhuam reng a ni a ti.

Vawiina Review Meeting-ah hian Union Minister for Statistics & Programme Implementation Pu D.V. Sadananda Gowda sawmna angin presentation enho a ni a -  Support for Statistical Strengthening (SSS) Scheme chungchang  Director of Economics & Statistics Pu Lalchhuanawma Hrahsel hnen atang ngaithlak a ni a, hemi hnu hian Members of Parliament Local Area Development Scheme (MPLADS) chungchang Aizawl Bawrhsap Dr.A. Muthamma hnen atangin, Road Projects chungchang NHIDLC lam atangin  leh Railways Projects chungchang Northeast Frontier Railways Official te hnen atang tein ngaihthlak a ni bawk a ni.

Presentation  te hi zawhna leh chhanna hun in a zui a, hemi hnu hian Planning Secretary Dr.C.Vanramsanga'n lawmthu sawina in meeting a khar zui ta  a ni.

Attachment

  • Loading attachment...