Vawiin khan Health Minister Pu Lal Thanzara chuan Health & Family Welfare Department buatsaih State Supervisory Board Meeting of PC&PNDT (Pre-Conception and Pre-Natal Diagnostic Techniques) Act, CMO Conference Hall-ah a neih pui.

Minister chuan PC&PNDT Act hi Mizoram-ah hriat lar tak nilo mah se, Central lamah ngaih pawimawh em em a ni, a ti a. Sawrkar Department leh pawl hrang hrang hnenah inzirtirna hi kalpui zel a ni, tiin a sawi a. Hmeichhe naupiang hlim tih hlum hi India ram pumah thleng nasa in, Mizoram-ah erawh chuan hriat tur a awm lemlo a ti bawk a. PNDT Act in a phal leh phal loh hriatchian leh zual kawngah State Supervisory Board te chuan mawhphurhna sang tak annei a ni, a ti a.

He meeting-ah hian mipui zirtirna nasa leh zual zawkin Kohhran Hmeichhia leh MHIP te hnenah kalpui ni se tiin an rel a. PNDT Act hi Mizoram sawrkar chuan tun dinhmunah chuan a hmang that thu report pek a ni a. Ultrasound khawl hmangtute trained persons annih leh niloh enfiah chungchangah pawh hmalak belh zel an tum a ni.

Tun dinhmunah hian PC&PNDT Act hmanga Mizoram chhunga Ultrasound Centre in register hi 52 niin, Aizawl District-ah 27, Lunglei District-ah 7, Siaha District-ah 3, Lawngtlai District-ah 4, Champhai District-ah 6, Kolasib District-ah 2, Serchhip District-ah 2 leh Mamit District-ah 1 a awm. Ultrasound Operators (Radiologist, Gynaecologist, MBBS Sonologist) hi 45 awmin, he danin a phal anga centre pahniha thawk 21 leh centre pakhata thawk 24 an awm a ni. Kum 2017, April atangin vawiin thleng hian Ultrasound Centre 39 endik tawh a ni a, dan hmansual avanga hrem an la nei lo a ni.

Kum 2011, Census-in a tarlan danin India ram Child Sex Ratio hi 919 a ni a, Mizoram Child Sex Ratio hi 970 a ni. Eastern Indian State zingah chuan Arunachal Pradesh a sang ber a (972), Bihar-ah a hniam ber a ni (935).

He meeting-ah hian Health Commissioner, State Supervisory Board member, Kohhran Hmeichhia leh MHIP te an tel.