Zan khat riaka Mizoram rawn tlawha lo zin Union Minister for Social Justice & Empowerment Pu Mukul Wasnik chuan nimin chawhnu lam khan I&PR Conference Hall-ah tualchhung chanchinbumite a kawm. Union Minister hi Mizoram Chief Minister Pu Lal Thanhawla te nupa, Social Welfare Minister Pu P.C.Lalthanliana leh MLA Pu John Siamkunga ten an tawiawm a ni.

Union Minister chuan Mizoram a rawn tlawh chhan bul ber chu tun hnaia Parliament In hniha eptu pawl ten Coal Block chungchang avanga buaina an siam leh rorel thei lo khawpa boruak sosang an siam chungchang hrilhfiah tura lo kal a nih thu a sawi a. Prime Minister ban hial phuta inhnialna lo chhuah chhan te leh thil awmdan a chin chhuaka hrilhfiah an tum pawh an ti sukuk dan te sawiin heng zawng zawng hi mipui rorelna kalphung tih bahlahna a nih avangin thil pawi tak a tling a ni, a ti.

Zawhnate chhangin Pu Wasnik chuan Lengpui Airport a lo thlen veleha Mizoram Social Welfare Minister Pu P.C. Lalthanliana’n state chhung atana Integrated Rehabilitation Centre 5 din rawtna a lo thlen chu tih puitlin a tum ngei tur thu chanchinbumite hnenah hian a sawichhuak nghal a ni. Chung IRC 5 dinna tura rawt te chu Vairengte, Thenzawl, Champhai, Saiha leh Lawngtlai ah te an ni, a ti. A Ministry hnuaia hmarchhak bial atana hamthatna tura sum awm te a tam thei ang ber hai chhuak thei turin Project siam buatsaih a duh thu a sawilang a. Rampumah Tar Pension hi kum 60 chunglam hnenah pek ni tawhin an pek zat pawh pun hret hret a ni, a ti bawk. Union Minister chuan Mizoram-ah NGO tha leh tangkai tak tak awm chu fakin heng mite zirtir tur leh kaihhruaina changtlung tak pe turin sorkar laipui chuan mithiam bik rawn tirh thin a tum a ni, a ti.

Union Minister Press Conference-ah hian tualchhung chanchinthar lakhawmtute an tel tha hle a ni.