Ni 3 awh tur Tlangnuam RD Block te tana infiamna runpui PYKKA Sports chu vawiin khan Sihphir Community Hall-a inkhawm buatsaihah Law Commission Chairman Pu R. Lalrinawma’n a hawng. He PYKKA Sports hi Sihphir leh Sihphir Venghlun ten an thleng a, September ni 11-13, 2012 chhung neih a ni ang.

Pu R.Lalrinawma chuan PYKKA Sports hi zokhua leh hmun kilkhawr zawka mite, thalaite sports lama tih hmasawnna leh an talent haichhuahna tura sorkar laipui hmalakna pawimawh tak a ni, a ti a. Thalaite tana infiamna lama hmasawnna thleng chho mekte ban phaa chhawr tangkai turin khawpui chhehvel khuate pawh intuaithar sauh sauh a pawimawh hle a, PYKKA chauh ni lo Central Scheme tam tak lo kal hi a nihna tur ang taka kan hman hi ram leh khawtlang hmasawnna tur a ni, a ti.

Tlangnuam R.D. Block hnuaia khua 13 - Samtlang, Lungleng-I, N.Lungleng, Sairang, Sairang Dinthar, Sihhmui, Lengpui, Nausel, Tuirial, Tuirial Airfield, Muthi, Sihphir Venghlun leh Sihphir te an tel a. PYKKA Sports-ah hian sport discipline 5 - Football (Boys), Table Tennis, Badminton, Weightlifting leh Race (100m, 800m & relay race) - ah te inelna an nei dawn a ni.