Saiha District chhunga NLUP hnuaia Coffee chin thlangtute tan vawiin chawhma dar 10:00 khan I & PR Conference Hall, Saiha ah training neih a ni.

Nikhat chhung neih tur he training programme ‘Coffee Board’ Branch Mizoram te buatsaih hi Pu Zothanmawia Khiangte, Sub-Deputy Commissioner, Saiha chuan a kaihruai a, Pu Selvaraj, Sr. Liaison Officer, Coffee Board, Branch Mizoram chuan thu sawiin Coffee chin thlangtute chu tih tak zeta hmala turin a chah a, an Coffee chinah hlawhtlinna chang ngei turin duhsakna a hlan bawk a ni. Pu R. Zothanmawia, Sr. Technical Assistant Coffee Board Branch, Mizoram pawhin thu sawiin Mizoram chu Coffee chinah Zone pahnih Lunglei Liaison Zone leh Kolasin Liaison Zone a then anih thu a sawi a, Coffee chin a lo hlawhtlin theih nana hmalak dan tur hrang hrangte a sawilang bawk. Coffee chi buatsaih dan atanga a chinna ramthlan dan tur te, a chinna tur khur sawngbawl dan tur leh a enkawl dan bakah Coffee rah sawngbawl dan hrang hrangte chipchiar takin a sawilang bawk.

He training-ah hian Saiha District chhung khaw hrang hrang atangin NLUP hnuaia Coffee chin thlangtu mi 31 an tel a, Coffee chin dan chungchanga hriatthiam loh an neihte zawhna leh chhanna hun bakah huamzau taka sawihona hun hman a ni bawk.