No.3769/2020-2021

Vawiin khan Union Minister Shri Prahlad Singh Patel chuan Thenzawl Golf Course chu NIC Video Conference kaltlangin a hawng a, khuallian a ni. Tourism Minister Pu Robert Romawia Royte chu khualzahawm a ni a, Lok Sabha MP Pu C. Lalrosanga, SEDP hnuaia Agriculture Development Board Vice Chairman leh MLA ni bawk Pu H.Biakzaua leh Sports, Youth Affairs & Tourism Board Vice Chairman Pu T.C Pachhunga ten Minister hi an tawiawm a ni.

Khuallian Shri Prahlad Singh Patel chuan thu sawiin Mizoram chu India ram zinga ram mawi ber pawl, biological hotspot leh khualzin (tourist) te tana ram nuam leh Indian Foreign Policy zinga pawimawh em em ‘Act East India Policy’ hlawhtlin nana state pawimawh tak a ni, a ti a. COVID-19 hripui leng karah project fund tang leh khaihlak a awm lo ang, a ti a. Hna a hun taka thawh zawh leh tha taka thawh a nih chuan Ministry atangin funding-ah harsatna Mizoram sawrkar-in a neilo ang, tiin a sawi a. Post COVID-19 atan Mizoram sawrkar chu Tourism Industry hmasawn nan a inbuatsaih sauh sauh a ngai a ni a ti bawk.

Khualzahawm Pu Robert Romawia Royte chuan thu sawiin Union Minister Shri Prahlad Singh Patel in-a video conference kaltlanga Thenzawl Golf Course a hawng chu lawmawm, a ti a. ‘Grade B certified’ Thenzawl Golf Course chu hmasawnna rahbi niin, India state tlemte zingah Mizoram in Golf Course tha tak a nei chu ropui a tih thu a sawi a. Thenzawl Golf Course chuan tlawhtu tam tak a neih a rin thu leh a chhehvela khawsa te tan eizawnna ti awlsam tu leh tourism lamah hmasawnna thlentu anih a rin leh beisei thu a sawi a. Minister chuan central project hrang hrang- PRASAD (Pilgrimage Rejuvenation and Spiritual Augmentation Drive) Scheme, Construction of Convention Centre in Mizoram leh Swadesh Darshan 2 hlawntlin nana Mizoram sawrkar hnathawh kalmek leh mamawh hrang hrangte a thlen bakah, Union Minister in hma a lakpui tawhna zawng zawngah lawmthu a sawi bawk a ni.

Khuallian Shri Prahlad Singh Patal aiawhin Khualzahawm Pu Robert Romawia Royte chuan Thenzawl Golf Course hawnna ribbon a chep chat a ni.

He hun hi Tourism Commissioner & Secretary Pi Esther Lal Ruatkimi’n a kaihruai a, Jt. Director Pu Saitluanga chuan Technical Report pe in, Joint Secretary Pi Irene Zohlimpuii Chongthu chuan lawmthu sawiin he hun hi a khar a ni.

Thenzawl Golf Resort hi Swadesh Darshan hnuaia Rs 6448.08 lakh senga zawh fel a ni a, Edufice Infraservices Private Limited, New Delhi-in contract hna hi thawkin, January, 2016 khan bul tan a ni a, 22nd April, 2019-ah hna zawh a ni. Eco log huts 30, Cafetari, convention centre, Gazebos 8 leh 18 hole Golf Course, parking te a awm a ni. Thenzawl Golf course hi Graham Cooke & Associates design a ni.