Nimin tlai khan Chief Secretary's Conference Hall-ah Pu Mansukh Mandaviya, Union Minister of State for Road Transport & Highways(MoRTH) chuan Mizoram PWD Officials, Regional Office, National Highways, Guwahati atanga lo kal Official te leh NHIDCL official te a kawm a. Hmarchhak bialchhunga hmalakna - abikin Mizoram chhunga hmalakna te chipchiar taka zawtin hmalakna thenkhat muanchan chhante a zawh bakah chak zawka hnathawh chhunzawm dan tur a sawipui.

Pu Mandaviya chuan Mizoram chhungah hmalakna engzah nge awm tih te, contract tute nge an thawhtir tih te, compensation buai vanga hna tangkhang engzah nge awm mek tih te leh eng vanga DPR ennawna hnathawh mek te senso zat tur siambelh a nih thin tih te a zawt a. Union Minister in zawhna a siam te hi Regional Office, National Highways, Guwahati leh Mizoram PWD ( National Highways) official ten an sawifiah a. Pu Mandaviya chuan Prime Minister Narendra Modi-an hmarchhak bial leh achhunga cheng mipui te tih hmasawn a duh a, chutiang bawkin contract chungchangah pawh tualchhungmi te duhsak a ngai tawh ang tiin contract liantham deuh te chu tualchhungmi te thawh theih tura siam rem dan kawng official ten an zawn a ngai a ti.

Compensation chungchanga buaina pawh pumpelh theih a nih thu a sawi a. DPR siam dawn reng rengin "Satellite image atanga en in hemi khua leh sawlai khaw karah sawn kawng kan siam dawn tiin project ruahman mai loh tur. Project siam hma in kawngpuiin a tan tlang tur bialtu, bawrhsap, khawtlang mipui leh an aiawhtute titipui hmasain buaina awm thei tur zawng zawng hmuh lawk in tum anga, chinfel dan kawng in zawn hmasak a ngai" tiin Engineer te chu fimkhur turin a chah a. " Hnathawh theih hun chhung thla 6 chiah in nei tih in hresaa chumi behchhan chuan hmalakdan tur in rel anga, furin kan hnathawh a tibuai tiin chhuanlam a awm reng tur a ni lo. A hun pangai chhungin contract te thawh zawh a nih theih nan in harsatna tawhmekte chinfel dan kawng dapin chhanna in zawng hmu tur a ni" tiin Project ennawn leh hna muan chhan sawifiahna chu chhuanlam tling a ni lo a ti. A awmna hmunin a zir em avang piahlamah a chhunga kawngpui, relkawng, KMMTP leh ICP hmalakna te hunreilote hnua arawn puitlin thuai dawn avangin Mizoram hmabak a eng hle a, a chhunga cheng te lehkhathiamna leh remna leh muanna in a belhchhah leh zel avangin Mizoram in nasa takin hma a sawn dawn tih a sawi a. Pu Mansukh Mandaviya, Union Minister of State for Road Transport & Highways(MoRTH) chuan Inland Waterways Ministry pawh a enkawl tho avangin Mizoram chhunga luidung awm te lawng hmanga inkalpawh theihdan a awm em tih state thuneituten enfiahin hma an la a nih phawt chuan lo ngaihven a tum thu a tarlang a ni.

Union Minister leh official te inkawmna hi Pu Lalram Thanga, Principal Secretary, PWD in a kaihruai Er Pawan Kumar, RO, Regional Office, Guwahati, Er K. Lalsawmvela, CE, MPWD (Highways) leh NHIDL official ten an hmalakna theuh a lem nena entirin an sawifiah a ni.