Nimin chawhnu khan Parliamentary Secretary for School Education, Pu Joseph Lalhimpuia chuan Millenium Centre Courtyard-ah Mizoram Bharat Scouts & Guides buatsaih ‘World Thinking Day 2017’ a hmanpui a. He hunah hian Mizoram State AIDS Control Society (MSACS) chuan Awareness Campaign an nei a ni.
Pu Joseph Lalhimpuia chuan he World Thinking Day theme hi ‘Grow’ anih angin midang tanpuina kawngah te, khawvela in unauna tha a awmna atan te leh midang tana malsawmna ni tura kan inpekna te lo thanglian zel se, a ti a. He movement hian midangte tana inpekna leh tanpuina te kengtelin kan pi leh pute nun atanga kan neih tlawmngaihna leh aia upate zah thiamna nun nen pawh a inrem thu Parliamentary Secretary chuan a sawi a. Khawvel hmun dangah leh Mizoramah ngei pawh thalai tam tak nun tichhe tu chu HIV/AIDS anih thu sawiin school naupang kalkhawmte leh thalaite chu nu leh pa, zirtirtu leh aia upate thuawih turin leh nun vawng fimkhur turin Pu Joseph Lalhimpuia chuan kalkhawmte a chah bawk.
Nimin February Ni 22 kha Scouts & Guides Movement dinchhuak tu Lord Baden Powell leh a nupui Lady Baden Powell te pianni niin hemi denchhen hian ‘Thinking Day’ hi kum 1926 atang khan hman tuma ngaihtuah chhuah a ni a. Khawvel hmun hrang hrangah Scouts & Guides member te hi maktaduai 10 chuang an awm a ni.
He hun hi Mizoram Bharat Scouts & Guides leh MSACS tangkawp buatsaih niin Sports and Youth Services Director, Pu Zothanmawia’n a kaihruai a. MSACS Project Director, Dr. Lalmalsawmi chuan thu sawiin HIV/AIDS darh chak chhan ber pakhat chu nun uluk loh vang anih thu leh zirlai naupang leh thalai te chu fimkhur turin a fuih a. Parliamentary Secretary chuan felicitation Medal leh Certificate a sem nghal a. School hrang hrang atangin Scouts & Guides te chu slogan kengin an kalkhawm a ni.
