Ram thenawm Myanmar Parliament (Hluttaw) a MP 5 te telna Delegation Mizoram rawn tlawh mek chuan nimin tlai khan Chief Minister Pu Lal Thanhawla chu a chenna in CM Bangla ah hmuin darkar khat leh a chanve chuang inkhawmhona hun tha tak an nei.

Myanmar Delegation hi - Oo Hla Saw, MP, Arakan National Party; Lama Naw Awng, MP, Kachin State Democracy Party ; Nyi Sein, MP, Ta’ang (Palaung) National Party; Sai Naunt, MP, Shan Nationalities Democratic Party; Nai Thiha, MP, Mon National Party; Saw Daniel, Party Chairman, Kayah Unity Democracy Party (KUDP); Mahn Aung Pyi Soe, Phalon-Sawa Democratic Party; Ceu Bik Thawng, Chin National Democratic Party; Duh Hu Thang, Chin National Democratic Party te an ni a. India rama Myanmar dan siamtute zinna hi Ministry of External Affairs (MEA) leh India rama thluak bur ‘think tank’ pawimawh tak Observer Research Foundation (ORF) bultum a ni a; ORF aiawh pathum, MEA aiawh pakhat leh Myanmar Embassy, New Delhi aiawh ten an rawn tawiawm a ni.

Chief Minister Pu Lal Thanhawla chuan Myanmar MP te telna Delegation in Mizoram an rawn tlawh chu lawmawm tiin an zin chhan te a zawt a. Pu Oo Hla Saw, CM zawhna changin India chu khawvela democracy lian ber leh hlawhtling pawl ber a nih angtein India rama federalism kalpui dante zirchiang turin, Mizoram in kum 20 chuang buaina leh tawrhna paltlanga remna leh muanna a neih dante, he remna a awm theih nana a kawng zawh te, hengte hi an ramah a hman ve thei dawn em tih te zirchiang turah an rawn kal thu a sawi a. India in Myanmar hmasawnna atana eng te nge a tih theih ang, a bik takin hnam tlem zawk ngaihtuahin tih te pawh kan zirchian dawn a ni, a ti bawk.

Chief Minister chuan India leh Myanmar inkarah sipai sawrkar lai pawhin inunauna boruak tha tak kan nei a, tuna mipui thlan tlin sawrkar ah phei chuan hei hi a tha leh zual a, Myanmar sawrkar hruaitute chunga lawmthu ka sawi a, hemi avangin hian Myanmar ram hruaitu te chunga lawmthu ka sawi, a ti a. Myanmara Mizoten Chapchar Kut hmanpui turah sawmna tihlawhtlin nana nikum an ramah a zin tumah Zo hnahthlak hrang hrangten amah an lawm dan leh an dawnsawn dan chuan a rilru a khawih takzet tih sawiin a hawn veleh a zin report leh thil hmuh dan te External Affairs Minister a sawipui a, chumi chuan Khampat Bungpui humhalhna kawnga awmzia a nei thu te , Mizoram Chhim lam leh Myanmar Chin state inkawlpawh awlsam zawk nana lei 4 dawh rawt chu sawrkar laipuiin a rem tih tawh thu te leh Mizoram leh Myanmar-a Zo hnahtlak te inkara nasa takin inuanau leh inlaichinna te a thuk belh nia a hriat thu te chu Myanmar Delegation hi a hrilh.

Myanmar MP ten Mizoram in remna leh muanna a neih dan leh hemi atan kawng a zawh dan te zawhna changin Chief Minister chuan Mizoram buaina kha politics buaina a nia, silai thil tihtheihna leh sipai chaknaa senghawi chi a ni lo a, politics bawka senghawi tur ani ti hriaiin a rem lo ate inbiak thei nan leh mipui duh ber remna leh muanna a awm thei nan eng chen pawh ke pen inhuamin theihtawp chhuahin hma kan la a, chumi atang chuan remna leh muanna kan nei thei ta a ni, a ti. Hmasawnna hnathawh dan leh Mizoram thawhchhuah chungchanga an zawhna changin Chief Minister chuan NLUP kalpui dan, a tum leh Mizoram dinhmun a siam that dan te a hrilh a. Central sawrkar nen a boruak chungchangah Hmarchhak state te chuan ngaihsak an hlawh tha hle tawh a, sawrkar reng rengin Hmarchhak tan nasa takin thawh a in huamin tan a lak mek thu te a hrilh bawk a ni. Kaladan Multi Modal Transport Transit Project puitlin hun chu Mizoramin leh rampumin a ngahhlel thu sawilangin he Project atan hian India chuan Myanmar Sawrkar chu kawng hrang hrang a tanpui mek tih a sawi a, he Project hlawkna chu Mizoram mai ni lo Hmarchhak state dangte pawhin an hlawkpui dawn a ni, a ti.

Nikuma Chief Minister Myanmar-a zin khan Myanmar Sawkar beng a verh hle a, Myanmar ah Zo hnahthlak ten ngaihsak an hlawh nia hriat a ni a. Myanmar Sawrkarin hmasawnna hna hrang hrang Chin state ah chak tak a kalpui nia hriat niin tunhnai khan Rih Dil leh a chehvel te cheibawl a ni a. Tun Chawlhni kalta February ni 19 khan Myanmar President U Htin Kyaw leh a nupui Daw Su Su Lwin leh Myanmar Sawrkar Minister 6 leh Chin State Chief Minister U Salai Lian Luai ten Chin state khawpui Tonzang, Falam leh Tiddim an tlawh a, helicopter in Rih Dil an tlawh bawk a, Rih Dil hmanga khualzin hip dan kawngte sawiin India a Zokhawthar khua leh Myanmar Rhikhawdah(Rihkhawdar) khua zawmtu lei pawh a tlawh bawk a ni. February ni 20 khan Chin National Day vawi 69-na Falam Sports Stadium-a buatsaih chu khuallin niin Minister 6 hovin a hmanpui a ni.

President zin tur thu hi Chief Minister Pu Lal Thanhawla chuan Champhai a chhuahsan dawn tun Inrinni zing kalta khan a hre ciah a, a remchang avangin Tuichang bialtu MLA Pu Lalrinliana Sailo chu Mizoram Sawrkar aiawihin Myanmar President leh a hote hmu tura a tih angin Pu Lalrinliana Sailo chuan Myanmar Sawrkar hotute a hmu a, Chief Minister aiawhin duhsakna a hlan a ni.