Vawiin khan Chief Minister’s Office-a Cabinet Room ah Chief Minister Pu Lal Thanhawla hovin a Department enkawl zinga Power & Electricity Department hnathawh leh hmalakna te thlirlet niin Review Meeting neih a ni a.

Meeting ah hianP & E Department Secretary Pu C. Lalhmachhuana, ITS; P&E Department Engineer-in-Chief Pu L. Pachuau leh Department-a a thawhpui senior officer-te an tel a ni. Chief Minister Pu Lal Thanhawla chuan nikum atang tawh khan Sawrkar Department hrang hrangte hmalak mek thlirletna neih tan anih thu sawilangin kumin pawh hian hetianga Review Meeting hi neih choh anih tur thu a sawi a. Mizoram ang state naupang leh thanglai mek chuan Hmasawnna ruhrel (Development Infrastructure) hi a la neih tlem avangin kawlpetha lamah pawh rualawh a nat thusawiin kawlpetha semdarhna te tih phuisui a, kawlpetha lakna leh semchhuahna lamah hlohna (transmission & distribution loss) te ti tlem a, mahni intodelh phawt a chutah a bang zawng chu zawrh theih hi kan duhthusam ber a ni a, a ti a. Turial Hydel Project kha ruahman angin a hun taka kum 2003/2004 vel khan zawhfel ni sela chuan kawlpetha siamchhuah zawng zawng kha Mizoram chan vek tur ani a, mahse tunah chuan an siamchhuah MW 60 atangin MW 12 ciah hi Mizoramin a thlawnna kan chan tur a ni a, a bak zawng chu kan man chawia kan lei a ngai dawn a, he hi thil lungchhiatthlak tak a ni, a ti.

Mizoram ah engkim Sawrkarah a inngah thu leh Sawrkar hnathawk te chu an pawimawh thu te sawiin mipuiin min zah em a, hetih rualin keini mipui chhiahhlawh leh sawrkar chhiahhlawh kan ni ti hriain kan mawhpurhna kan hriatchian a tul ve khawp mai a, mahni theuh inbihchiang ila, ram tan engemaw kawng tala kan lo thawhchhuah (contribution) kan neih chuan nasa takin awmzia a awm thei ka ring a ni, a ti a. Transmission leh Distribution Loss sang lutuk tihtlem dan te, nizung chakna hmanga kawlpetha siamchhuah te hi uar leh zawk kn kalpui a ngai a, thli hmanga kawkpetha siamchhuahna kawng te pawh a tul chuan leh thli hmanga kawlpetha siamchhuah te hi kan tan lakna tur niin ka hria, solar leh wind power te hi tun aia tihlar dank an ngaihtuah a tul a ni, a ti.

Thuhma a sawi hnuin Chief Minister in P & E Department Secretary Pu C. Lalhmachhuana chu presentation pe turin a sawm nghal a ni. Pu C. Lalhmachhuana chuan kawlpetha chungchangah Mizoram dinhmun leh mamawhte sawiin Scheme hrang hrang an kalpui mekah an thlen chin leh an hmabak te an tarlang a, hnathawh kawnga an harsatna thenkhat te an sawilang a. Kawlpetha semdarhna kawnga sub station tihchangtlun dante, Department in power leina kawnga Budget Allocation tihfuh tawk loh avanga power lei nan sum sen belh ngai ‘surcharge’ pumpelh dante leh hlohna titlema, Department sum thawhchhuah tihsan dante sawiin presentation . Thla khata a bill pek theihna vawi 2-siam te, Meter Reader te hlawk zawka chhawr dante, consumer ten an complain na tur call center din chungchangte sawiin March thla chhungin Department-in online a electric bill pek theihna tur a siam fel tur thu leh ATM hmanga POS kaltlanga bill counter-a bill pek theih dan siam an tum thu meeting ah hian a sawi a.

Mizorama Hydel Project hrang hrang siam mek te dinhmun pawh sawilangin henga Chief Minister zawhna te chu a buaipuitu Engineer ten an chang a. Mizoram Solar Power Policy hnuaia Department in hma a lak tum dante pawh tarlangin solar scheme thenkhat an duan mek chungchangte pawh a sawi a ni.

Department lamah SDO/AE te indaihlohna te pawh tarlangin post ruak hnawhkhah anih loh chuan nakin zelah harsatna an tawh tur thu a sawi a ni. Meeting ah tarlan danin Mizorama khaw 26 hi eng la luh lohna khua (non-electrified villages) a ni a, Mizoram chhim lama khaw thenkhata hna kal mek a awm a; hengte leh khaw eng lote en pek hunah chuan Mizorama khaw zawng zawng hi an eng vek thei dawn a. Hemi atan hian Department theihtawp chhuahin tan an la mek a. Chawhrualin thla tin poer lei nan hian cheng vaibelchhe 24.13 vel sen ni thin a. Mizoram chan tur kawlpetha pekchhuah hi hman sen loh, a awm fo thin a, hei hi Sawrkar in state dang hnenah zuar lehin heng atang hian kumin sawrkar kal mek (Dec 2016 thleng) khan cheng vaibelchhe 33.21 hu man kawlpetha hralhchhuah (power trading) sum thawhchhuah a ni tawh. Solar Power Policy hnuaia hian Thenzawl ah MW 10 leh Tlungvel ah MW 20 siamchhuak thei Solar Energy Park siam tum a nih bakah Mizoram khaw 10 a Solar Power Plant a belhkhawma power kW 609 siamchhuak thei te siam tum a ni bawk.

Mimal ten an mahni inchunga nizung hmanga kawlpetha an siamchhuah chu sawrkarin a lei dan tur chu Solar Power Policy ah hian ruahman tel a ni bawk. March thla chhung hian online-a electric bill pek theihna tur ruahman fel tum niin bill counter zawng zawngah ATM card a bill pek theihna tur POS khawl dah tum a ni a. Consumer ten an complain tur Call Center pawh din dan tur pawh ngaihtuah mek a ni.

Meeting ah hian Turial HEP, MW 60 pechhuak thei chungchang pawh sawilan niin MW 30 hi kumin June thla leh a bak MW 30 hi October thlaah commissioned beisei anih thu tarlan a ni.

Tarlan tawh angin hetiang hian PWD hnathawh thlirletna hi tun thla tir lamah khan Chief Minister hova neih a ni a, Department dangte pawh hetiang Review Meeting hi hun remchanga neihpui zel an ni dawn.