638/2025-2026

29th May, 2025 : Zan khat riaka Mizoram rawn tlawh Union Minister, Women & Child Development Pi Savitri Thakur chuan vawin khan Zoram Medical College & Hospital tlawhin, Aibawk RD Block-a hnathawh ṭhenkhat a en bawk.

Union Minister hova Zoram Medical College-a Academic Block lama hotute leh zirtirtute nen inkawmhona hun an hmanna chu Prof Swati M. Patki, Dean, Zoram Medical College-in a kaihruai a. Zoram Medical College-in hma a sawnna te leh Mizoram pum mipuite hriselna tura an hmalakna dan tur leh zirna chungchang te sawiho a ni a, damlo enkawl leh hriselna chungchanga harsatna hrang hrangte Minister hnenah thlen a ni bawk. Union Minister hian Mizoram chhunga sawrkar hmalakna hrang hranga tlawmngai pawl - YMA, MHIP, MUP, Kohhran leh adt. tha thawhna leh thawhhona chu ropui a tih hle thu a sawi. Inkawmhona neih zawh hian Zoram Medical College building sak mekte a en a, ZMC chhunga Creche (Child Care Centre) tlawh lehin, Ministry of DoNER hnuaia NESIDS (OTRI) Scheme-a thawh ‘Residential Hostel' pahnih, Hosteller 82 ve ve awm theihna a tlawh leh a, Hospital chhunga Emergency Department, Obstetrics, Gynaecology Ward, Paediatrics Ward, SNCU leh NICU -te a fang kual bawk.

ZMC a tlawh zawh hnuah Union MoS Pi Savitri Thakur chuan Aibawk BDO Office tlawh lehin, Plastic Management Unit, PHE leh RD Department ṭanghova an siam chu a tlawh a, ṭha a ti hle. Plastic Management Unit a tlawh zawh hian Aibawk Anganwadi Centre -III tlawh lehin, Anganwadi Centre-a beneficiary-ten an dawn ṭhin - Take Home Ration, Hot Cook Meal leh Saksham Anganwadi & Poshan 2.0 hnuaia Anganwadi Centre tihchangtlunna RO Water filter, LED TV , ECCE kalpui dan leh naupang infiamna hmanraw chi hrang hrangte a en leh a, WCD Mizoram hmalakna ṭha a ti hle.

Kum 2024-a sak zawh Panchayat Bhawan Aibawk tlawh lehin, PMAY (Gramin) mirethei in sak ṭanpuina luah luh tawh a en leh a, ṭha a ti hle bawk a ni. Hemi hnu hian MgNREGA hnuaia kawng siam en lehin, Mizoram chhuahsan turin Lengpui Airport a pan tlang a ni.