637/2025-2026

Dated Hnahthial, 29th May, 2025 : India ram pum huapa tunlai hmanrua leh thiamna hmanga loneitute puihna tura hmalakna - Viksit Krishi Sankalp Abhiyan (VKSA) chu Hnahthial leh Lunglei district tan Hnahthial DC pisa kawtah hawn a ni a. Dr. Henry Saplalrinliana, Sr. Scientist & Head, KVK chuan he hun hi kaihruaiin Pu Zothanmawia Khiangte, Additional Deputy Commissioner, Hnahthial District chuan team pathumte chu a vailiam a ni. He hun hmanna ah hian Hnahthial leh a chhehvel a VC te leh kuthnathawktu thlan bik te an tel bawk.

Addl. DC, Pu Zothanmawia Khiangte chuan he campaign duan a nih chhan sawiin -"India ramin tharchhuah ngah mah se kan hmun, hun leh tha sen ral chhut chuan kan tharchhuah a tlem hle a. Kan thawh mila thlai thar chhuah tihtam a nih theih nan tunlai thiamna nen a loneitute ziritirna pek hi he campaign thil tum chu a ni" a ti. Tun campaign hian India ram pumah District 700 a huam tur thu sawiin KVK Hnahthial leh Lunglei ala inkawp rih avangin he campaign-ah hi chuan district pakhat angin an kal tur thu a sawi a. Mithiam hrang hrang tirhchhuah turte hnenah thu chahin loneitu leh kuthnathawktute harsatna ngaithla tur leh an mamawhte phuhruksak tura theihtawp chhuah turin a chah a ni.

Hawnna programme neih zawh hian Agriculture and allied sectors lama mithiamten he huna kalkhawm kuthnathawktute leh lo neitute hnenah central scheme hnuaia an hamthatna hmuh theihte hrilhfiahna hun an hmang nghal a ni.

VKSA hian Lunglei leh Hnahthial District chhunga khaw 99 te a huam dawn a. He campaign-ah hian Horticulture, Agriculture, AH&Vety, Sericulture leh Fisheries a mithiam te chu Team thum (3)-ah inthenin anni hian thlai chin leh venhim dante bakah ranvulhtute hnenah zirtirna pein an harsatna sut kian theih dan tur an zirchiang ang. Sawrkar scheme hrang hrangte hrilhfiahna an nei nghal bawk ang.

Campaign hi ni 15 awh tura ruahmanna siam niin May ni 29 atanga June ni 12, 2025 thleng neih tura duan a ni.