Zan khat riaka Mizoram rawn tlawh Union Minister of State for Consumer Affairs, Food & Public Distribution Prof. K.V. Thomas chuan tukin zing khan Khatla-a Ration semna hmun pahnih Khatla FPS Retailer I & II a tlawh a. Mizoram FCA&CS Minister Pu H.Rohluna bakah sorkar mi pawimawh engemawzatin an tawiawm a ni. Tualchhung chanchinbumite I&PR Conference Hall-ah a kawm bawk.
Chanchinthar lakhawmtute hmaa thu a sawiah Union MoS chuan Mizorama ration sem dan chu tha hle a, a hmuh thu te, state dangah chuan ration buhfai leh thildang zaa 20-25% lai a puhruk laiin Mizoramah erawh hetiang awm ve lova a hmuh thu te, ration dawrte chu tunlai thiamna hmanga thuam theih nise a duh thu leh ration latu mipuite pawh an lawmin buhfai lak theih zat erawh tihpun theih nise an duh thu an lo hrilh chungchangte a sawi lang a ni. Pu K.V. Thomas chuan state dangten chhungkaw tin tan thla tin buhfai 15 kgs. an dawn laiin Mizoram leh hmarchhak state dangte chuan ration buhfai thla tin chhungkaw tin tan 35 kgs. sem an ni thung a ni, a ti. Nikum October thlaa Mizoram Larsap nen New Delhi-a an inhmuh tuma Governor ngenna angin nikum November thla atang khan Mizoram buhfai quota chu economic cost Rs.11.85/- angin 1600 tonnes-a tihpun a nih tak bakah Food Minister Conference neih tuma Mizoram FCS&CA Minister Pu H. Rohluna’n a ngenna chhangin tunah hian Mizoram rawn tlawha a lo zin hmain APL atan 3000 tonnes leh BPL tan 8000 tonnes a tihpun leh tak thu chanchinbumite chu a hrilh a ni. Minister chuan rampumah ration semdan chu computer leh khawl changkang zawk hmanga kalpui vek tum a nih thu sawiin Mizoram tan pawh an mamawh senso tur sorkar laipuiin a ngaihtuah mek a ni, a ti.
Mizoram chhunga kudam chungchang sawilangin Pu K.V. Thomas chuan tun dinhmunah Bualpui, Champhai leh Serchhip-ah te kudam lian tham tak an awm mek a; Bairabi leh Sairang-ah pawh 10,000 MT dawng zo tur sak tum a ni a; Lunglei, Aibawk leh Mamit-ah kudam liantham zawk sak te chu peih tep an ni, a ti. Heng bakah hian hmun dang 17 laiah kudam sakna tur cheng vaibelchhe 9.6 ruahman mek a nih thu te, kudam awmsa changtlung zawka siam bakah Consumer te hmakhua chak lehzuala kalpuina kawngah tan lak zel a tum thu Pu Thomas chuan vawiin chanchinbumite a kawmnaah hian a sawilang bawk a ni.
Press Conference-ah hian FCS&CA Minister Pu H.Rohluna leh Food Corporation of India hotu pawimawhte pawh an tel.
Union Minister lo zin hian Aizawl a cham chhungin Mizoram Larsap Pu Vakkom Purushothaman a kawm a. Nimin khan Mizoram Chief Minister pawh a chenna inah hmuin thil pawimawh chi hrang hrang an sawidun. Sorkar laipui Minister hi Delhi atangin a nupui Pi Sherly Thomas; Pu Pankaj Agarwala IAS, Addl. Secretary (Consumer Affairs), Pu Girish Shanker IAS, Jt. Secretary (Public Distribution); Pu K. Satish Namboodribad, PS to MoS leh Pu Trilok Chand, APS to MoS ten an rawn tawiawm a ni.
