Zan khat riaka Mizoram rawn tlawhin Union Minister of State for Panchayati Raj Pu Nihalchand chuan vawiin tlai khan State Guest House, Chaltlang ah LAD Minister Pu P.C.Lalthanliana, Parliamentary Secretary Pu K.Lalrinthanga, LAD Secretary Pu C.Thatkunga leh LAD hotu dang te, Mizoram puma Project Director, DRDA leh District Council hotute nen inkawmna hun an hmang.

 MOS Pu Nihalchand chuan ram puma Panchayati Raj kalpui dan chu Sawrkar Laipui chuan a ennawn mek thu te sawiin State Sawrkar te thuam chaka, thuneihna tam zawk peka anmahni inrelbawl tura kalpui an duh thu a tarlang a. Khawtlang inrelbawlna ah hmeichhia a tam thei ang ber dah a pawimawh thu te a sawi lang bawk. Khawtlang hmasawnna tur ruahmanna te siama Sawrkar Laipuia thehlut turin a sawm a, a tul anga an lo bawhzui tur thu te a hrilh bawk.

Mizoram LAD hotute chuan Mizoram ah Panchayati Raj nei lova, Village Council kalpui a nih dan leh a hnathawh dan hmang te an hrilhfiah a, tun dinhmunah Mizoram pumah Village Council 812 awmin chung zinga 279 chu Autonomous District Council hnuaia awm a nih thu te, Village Council Member zawng zawng 2056 awm zingah 564 chu hmeichhia an nih mek thu te an hrilhfiah a, khawtlang mamawh chi hrang hrang thawka hma an lak thin dan te a sawifiah bawk. Thirteenth Finance Commission atangin khawtlang mamawh hna chi hrang hrang thawh nan sum Rs 8787.19 lakhs dawn a nih thu te an tarlang bawk.

LAD hotute chuan XIV Finance Commission Local Body Grant dawng thei lo state 3 zingah Mizoram chu a tel avang leh Mizoram Sawrkar sum harsatna avanga a bik taka ngaihtuah an mamawh thu te MOS hnenah hian an thlen a. District Council hotute pawhin an harsatna leh mamawh te MOS hnenah hian an thlen ve bawk a ni.

Union MOS Pu Nihalchand hi Pu Manoj Sharma, Consultant, Ministry of Panchayati Raj-in a rawn tawiawm a ni.