Sawrkar  Laipui hmalakna hrang hrang hnuaia sum hmuh leh hmandan endik tura din Mamit District Level Vigilance and Monitoring Committee chu vawiin khan Committee Co- Chairman Pu Ronald Sapa Tlau, MP (RS) hovin Mamit DC Conference Hall-ah an thukhawm.

Meeting kaihruaitu Pu Ronald Sapa Tlau chuan ram hmasawnna fawng chelh tak tak tu chu District-a hnathawka awmte an nih thu sawiin, mahni hnathawhna hmun nuam ti a, taima tak leh thahnemngai taka hna thawhna hian kori a tu a ni a ti a. Hnuhma tha hnutchhiahtu leh a tha zawnga danglamna thlentu ni ngam turin District Officer te  chahin, hlemhletna laka fihlim mi ni ngam tlat turin a chah bawk. District-a Department hrang hranga Officer te thawhhona tha tak nena hnathawk a District ti hmasawntu ni turin a chah a ni. Hmasawnnan sum tam tak sawrkar laipui atang a lo kal thin thu sawiin, Pu Ronald Sapa Tlau chuan heng hi a hmanna tur dik taka hman a ni em tih en hi Vigilance Committee chuan a tum ber a nih thu a sawi a, NGO te pawh bengvar chhuah a venpui turin a sawm.

Vawiin Meeting-a tel Pu Lalrobiaka, MLA  Chairman ZIDCO pawhin thawhhona tha tak an neih chu chhawm nun zel a duh thu sawiin District officer te mahni hna theuh thahnemngai tak leh rawngbawlna a ni tih hre chunga thawk turin a chah.

Vawiin Meeting-ah hian Sawrkar Laipui scheme hrang hrang hnuaia hmalakna thlir ho a ni a.  Mamit District ah hian kum 2014-2015 ah chhungkaw 20188 te tan ni 23 inhlawhna siam a nih thu leh, IAY hmanga in 50 sak a nih tawh thu Pu K. Lalhmingliana, PD DRDA chuan a tarlang a, kum 2015-2016 chhung hian Job Card nei mi 20188 te hnenah  hian ni 2 inhlawhna siam a nih tawh thu leh IAY leh scheme dangah chuan sum la dawn a awm loh thu a sawi. IWMP hnuaia Project te pawh tha taka kalpui thin a nih thu tarlan niin Sawrkar laipui tih dan angin IWMP hnuaia sum semchhuah leh thawktu te hlawh pek chhuah chu Ha anga chhut a nih thu tarlan tel a ni bawk .

Nausen kum khat hnuai lam thi  kum 2014-2015 chhung khan Mamit District 51 an awm thu Pi Hmingthanmawii, CMO chuan a tarlang a, IMR 41 a nih thu a sawi. Malaria vanga thi kum kalta khan 7 an awm thu sawiin, tunkum kal lai mekah 3 an awm tawh thu a sawi a, Hei hi Malaria vanga thi tamna leh vei an hmuhchhuah tamna hmun-a PHC awmte hman theih a awm loh vang a nih thu sawiin, Kanhmun PHC leh Marpara PHC te hman theih a siam a hnathawktu dah vat a tul thu a tarlang a ni.

RGGVY hnuaiah Mamit P&E Division enkawl khaw 84 awmin, hna zawh vek a ni tawh a, thawmthat ngai awmte Department-in a bawhzui thu tarlan a ni.Heng bakah hian PMGSY, NRWDP, SBM leh NSAP hnuaia sum hmuh dan leh hman dan thlir ho a ni a. Sum hmuh tlai leh kal muang thin lutuk chu hnathawh ti thuanawp tu a nih thu tarlan niin Committee chuan a theih anga hmalak ni se a ti.

Sawrkar laipui in Quarterly a Vigilance Meeting hi nei thin tura a duan angin meeting hi neih a ni a, Meeting neih leh hunah scheme hrang hrang hnuaia hmalakna a hmuna en theih tur a ruahmanna siam ni se Committeee chuan a ti a ni.