363/2026-2027

Dated Aizawl, the 4th of May, 2026: Zan khat riaka Mizoram tlawha lo zin Union Textiles Minister Pu Giriraj Singh chuan vawiin khan Mizoram Handloom and Handicrafts Development Corporation Limited (ZOHANDCO) Office a tlawh a. Sericulture Minister Pu Lalthansanga’n Union Minister hi a tawiawm a ni.

Union Textiles Minister pual hian ZOHANDCO chuan mizo kutchhuak, puantah chi hrang hrang leh thiamhnangdeh chi hrang hrangte phochhuahna (exhibition) an buatsaih a, Minister chuan he exhibition-a thil phochhuahte a enkual hnu hian puantahtute leh sumdawngte nen inkawmna a nei leh bawk a ni.

Union Textiles Minister Pu Giriraj Singh chuan, Silk vang leh tha bika an sawi - Muga silk chu Mizorama a tam thu sawiin, Mizoram chu ‘Golden State’ tih hiala koh a duh tih a sawi a. Kum 2035-ah chuan silk metric ton 1000 aia tam an dehchhuah theih ngei a beisei thu leh Central sawrkar chuan kuthnathawktute hmasawn zelna atan sum pek chhuah an ui loh thu a sawi. Hmeichhiate chawikan pawimawhzia sawiin, puantahtu nuhote chu Lakhpati Didi scheme hmang tangkai turin a chah a; he scheme hnuaiah hian tun dinhmunah cheng nuai 5 thleng pek theih niin, nuai 10 thleng dawn theih tura siam an tum thu a sawi bawk.

Union Textiles Minister Pu Giriraj Singh chuan Sawrkar Laipui Textiles Ministry atanga, amah tawiawmtu officer pawimawh eng emaw zatte nena Mizoram an lo tlawh chhan sawiin, zin satliah mai mai an nih loh thu te, Mizorama Sericulture Department than zelna tur te, farmer-te hmasawnna tur leh Mizoram mipuite thatna tur ngaihtuaha lo kal an nih thu a sawi.

Sericulture Minister Pu Lalthansanga pawhin Union Textiles Minister Pu Giriraj Singh-a leh sawrkar laipui hnenah lawmthu a sawi a. A cham chhung ni hnih lek chhunga Mizoram tana hna tam tak a thawh hman avang leh a inpeknaahte lawmthu sawiin, Mizoram pawhin hma sawn turin theihtawp an lo chhuah tur thu a sawi.

Weavers’ Service Centre, Eastern Zone, Zonal Director Pu S Bandyopadhyay chuan an hmalak tawhna hrang hrangte tarlangin, Guwahati a pilot project an kalpui mek - ‘market led model’ chu Mizoramah kalpui ve an tum tih a sawi a. He market led model-ah hian Weavers’ Service Centre hnuaiah training buatsaih thin niin, training kal mekte tan hnathawh tur an zawnpui nghal thin a. Mipui lei duh zawng leh hralh tla tur thil zirchiannate kalpui thin niin, chumi mil chuan trainee-te chu zirtir an ni leh thin a, an kutchhuakte hralhna tur pawh zawnsak nghalin, training an neih mek lai pawhin an thil siam chhuahte hi hralhsak an ni thin a ni. WSC a training chhuak-te hian kum khatah cheng nuai 5 tal an hlawh chhuah theihna turin hma an lakpui thin a ni.

Vawiin programme tawi buatsaihah hian Pu Giriraj Singh chuan SAMARTH Training Certificate leh E-Pehchan Card a sem a. Hei bakah hian Yarn Pass book leh Artisan ID Card semchhuah niin, Certificate of Appreciation of Workshed, Frame Loom & Lighting unit chu Pi Lalramthangi hnenah hlan a ni bawk.

Handicrafts Service Centre Regional Director Pu HK Baro chuan lawmthu sawiin hun a khar a ni.

Union Minister hi a PS Pu Yogendra Singh, IAS; APS Pu Jai Krishna; Ministry of Textiles hnuaia Textile Commissioner Pi Vrunda Manohar Desai, IRS; Central Silk Board(CSB) Member Secretary Pu P. Siva Kumar, IFS; Mizoram Sericulture Department Secretary Pi Florence Zotluangpuii, MCS; Sericulture Department Director Pu Lalrinawma te bakah official dang ten an tawiawm a ni.