Vawiin chawhnu dar 1:00 khan UN (FAO) team a mi, Dr. AB. Negi chuan Serchhip a tlawh a, Serchhip District Bawrhsap Pi Juhi Mukherjee kaihhruainain khawtlang hotute leh department official-te nen PRRS chungchang leh a tihbo dan turte an sawi hova, PRRS avanga harsatna tawktu chhungkuate a tlawhkual bawk.
Dr. Negi chuan Mizoram a lo kal chhan sawiin PRRS avanga ranvulhtuten harsatna leh hlohna nasa tak an tuar thin chu tihtawp a nih theih nana hmalak dan tur, khawtlang hruaitute mai bakah ran vulhtu te nena ngaihtuah ho a nih thu a sawi a, khawtlang anga tanrualin awmzia a neih thui hle a rin thu a sawi bawk. Dr. Negi chuan Mizorama vawk kan vulh dan chu PRRS lakah a him viau a rin thu a sawi a, Mizoramah chuan kan vawk vulhte kan khung deuh vek a, tin hmun khatah vawk tam tak tak vulh lovin mahni vulh te te, tlem te tein kan khung hrang thliah a, hei hian an inkaichhawng awlsam lutuk tur a veng tha hle a ni a ti.
Dr. Negi chuan ran natna chungchanga ama mimal ngaihdan pawh sawi lang telin, ran thi tawhsa sa ei chu tha lo mahse PRRS leh Bird Flu vei sa ei te erawh chu mihring tan an hlauhawm lem lo tiin heng hrikte hi tihhlum an harsa lova, hmin tha taka kan chhum hi chuan an thi vek a ni tiin mihring tan chuti taka tih an ngai lova, tin a vei tih kan hriat veleha thah chimih tum pawh hi a tul kher lo a ni a ti. Hetih lai hian heng ran natna te hian ranvulhtute tan channa nasa tak a thlen avang leh an hmasawnna thanmawhbâwk a nih theih tlat avangin a tibo tura hma kan lak erawh chu a pawimawh em em reng a ni a ti bawk.
