Joint Electricity Regulatory Commission for Manipur & Mizoram (JERC) leh Mizoram Sorkara P&E Department tangkawpin nimin khan YMA Sub-Hqrs Conference Hall, Lunglei-ah ‘Workshop on Electricity Consumers Awareness’ neih a ni.

Workshop hawnna inkhawm hmanpuitu Lunglei Addl DC Pu H.Dolianbuaia chuan Lunglei mipuite tan hetiang workshop buatsaih a nih chu lawmawm a tih thu a sawi a, mipuite hian thil kan hriatchian a, a nihna ang taka kan hman a pawimawh a ni, a ti. Kawlphetha chungchanga mipuite lam atanga zawhna awm fo thin leh harsatna an tawh thinte sawihona hun remchang tak a ni a, mipuite chanvo leh mawhphurna chungchang inhrilhhriat hun a nih ang takin kalkhawm zawng zawngten Workshop hi tangkai taka an hman ngei a beisei thu sawiin duhsakna a hlan a ni.

‘Workshop on Electricity Consumers Awareness’ neihah hian Electricity Supply leh mipuiten harsatna an tawh palha, an zualkona tur chungchang Er.Lalchharliana Pachuau, Chief (Engg), JERC (M&M) in a sawifiah a. SE, Lunglei Power Circle Pu R.Lalrema, EE Power Maintenance Division-I, Lunglei Er.WC Lalchhuanliana leh EE Power Maintenance Division-II, Lunglei Er.Saphnehzova ten Mizoram bakah Lunglei Power Circle chhunga kawlphetha pekchhuah dan leh a kaihhnawih thil hrang hrang bakah harsatna tawh thin hrang hrang chungchang an sawi bawk a ni.