Sawrkar laipuiin mipuite hmasawnna tura ruahmanna a siam inhrilhhriatna hun Public Information Campaign(PIC) Lunglei District-a Mualthuam North khuaa neih chu vawiin khan zawhfel a ni a. PIC kharna inkhawm hi Mizoram Women's Commission Chairman Pi Vanlalawmpuii Chawngthu-in a hmanpui.

Public Information Campaign ni 3-na leh a kharna inkhawmah hian Khuallian Pi Vanlalawmpuii Chawngthu chuan kalkhawm mipuite hnenah rorelna leh khawtlangah Mizo hmeichhiate tana hun thar a inher mek thu a sawi a. Tun hnaia Assembly Session neih zawh taka V/C inthlannaa hmeichhiate tana seat hauh leh Mizo Customary Law tih danglam a ni te chu a lawmawm hle a, Mizo hmeichhiate tan bung thar ropui tak a ni a ti. Sawrkar laipuiin ram mipuite ngai pawimawha, hmasawnna tur ruahmanna hrang hrang a siam te chu a ropui a tih thu a sawi a, heng ruahmannate hi a puitlin nan mipuite mawh an phur ve thu a sawi bawk a ni.

PIC Nodal Officer Pu Lalsawmliana kaihhruai PIC kharna inkhawm hmannaah hian PIC Core Committee Chairman Pu Mangjangam Touthang chuan kalkhawm mipuite lawmna thu leh PIC kalphungte bakah khawtlang hmasawnna tur thil pawimawhte a tarlang a ni. Tum danga tih angin PIC neihnaah hian mipuite hnena sawrkar ruahmanna inzirtirna hun buatsaih niin Lunglei Dist MJA Fin. Secy. Daily Post Chanchinbu Editor Pu Lalchuanawma'n a kaihhruai a; he Technical Session-ah hian faina atana beihpui thlakna ‘Swachh Bharat Abhiyan’, Rural Road Connectivity (PMGSY) leh Mizoram Tobacco Control Society hmalakna chungchang sawizau a ni.