Vawiin hi Universal Children’s Day a nih angin Tribal Art Centre, Tanhril-ah Mizoram Bal Bhavan Society leh Integrated Child Development Service (ICDS) tangkawp chuan nileng awhin naupangte tan programme a buatsaih a; he hun hi Parliamentary Secretary Pu Lal Thanzara chuan a hmanpui.

Pu Lal Thanzara chuan, “Ram changkang leh hmasawn apiangin naupangte an dah pawimawh a; Mizote pawhin hmanlai hun anga naupangte uite rim nam tia hnar kha kan bansan a hun tawh a; Lal Isua anga naupangte lawmtu kan nih a pawimawh a ni” a ti. Naupangten puitlingte ang bawka dikna leh chanvo an neih thu pawh sawi langin Pu Lal Thanzara chuan, “An sahimna pek te, an nunkhaw nawmna tur leh hmasawnna tur ngaihtuahsak te, chanvo pekte hi United Nations pawhin an chanvo tura a ruatte a ni a. Puitling zawkten kan nawm kan maka kan tihduhdah theih an ni lo a; an kalna awm kawng hriatsak a, zirtirna tha pek hi kan mawhphurhna a ni” a ti a. Nuleh pate leh naupangte enkawltuten naupangte hlutna hrethar a, naupangten thlamuang taka nun an hman theihna tura mahni inchhung theuh leh khawtlang leh ram siamtha tura tanlak a pawimawh a ni, a ti bawk.

Vawiina Children’s day lawmna programme-ah hian naupangte chu infiamna chi hrang hrang buatsaihsak an ni a; Bal Shree Camp neih chhunga thuziak te, lemziak te leh science hmanga inelna chi hrang hranga tithate hnenah lawmman atan certificate leh pawisa sem an ni. ICDS Project hi Mizoram-ah chuan kum 1975 atang khan Lungdar East-ah hawn tan a ni a; tunah hian Project 27 a awm mek a; heng project hnuaiah hian aganwadi 1980 a awm a ni. ICDS hian a tum ber chu naupang kum 6 hnuailam te, raipuar leh nau hnute chawmlai nute hriselna enkawl leh chawtha pek a ni a; an hnathawh that avang hian Mizoram-ah raicheha thi te, chawtha ei tur neih loh avanga naupang sawngnawi te, nausen thite a tlem phah hle thu Social Welfare Director Pi A. Vanlalzawmi chuan a sawi.