UNODC (United Nations Office on Drugs and Crime) leh World Vision tangkawp chuan ruihhlo dona kawnga an hmalakna kal mekah Mizoram kohhran pawl hrang hrang te nen thawhhona tha tak an neih zel theih nan vawiin khan Aijal Club-ah “Engaging the Faith Based Organisations in Drug Use and HIV/AIDS Prevention, Treatment & Care” Conference a buatsaih a ni. He conference hi Lunglei High Power Committee Vice Chairman, Pu Joseph Lalhimpuia, in a hmanpui.
Pu Joseph Lalhimpuia chuan Mizoramin kum tam tak kan buaipui tawh ruihhlo do kawnga UNODC-in Sorkar leh tlawmngai pawl hrang hrang baka Kohhran pawl te nen thawhhona kawng an siam chu lawmawm a tih thu a sawi a. Kohhran pawl hrang hrang te chu zu dova, zu that lohzia an inzirtir ang bawkin ruihhlo chungchangah pawh inzirtirna leh hmalakna nasa zawk la thei se tiin, Pu Joseph Lalhimpuia chuan Conference chu thu tha tak tak sawiho a tawp mai lovin, a bul tanna chauh a ni tih hrereng turin kalkhawmte a chah a ni.
Conference-ah hian Mizo thalaite zinga ruihhlo hmansual chungchang leh drugs vanga nunaute chunga harsatna chi hrang hrang thleng thin te, HIV/AIDS veite leh damdawi hmansual vanga harsatna tawk ten khawtlanga diriam leh endawng an tuar thin tih reh kawnga kohhran mawhphurhnate leh hmalakna kawng hrang hrang sawiho a ni.
Health & Family Welfare Ministry in HIV Sentinel Surveillance 2010-2011, National AIDS Control Organization (NACO) report-in a tarlan danin India ram pumah Mizoram chu inchiu (IDUs) vanga HIV hrik inkaichhawn tamna ber state panga (5) zingah a tel a ni. Hmarchhak state dangte an tlakhniam laiin Mizoram erawh chu inchiu vanga HIV inkaichhawng an la pung zel zawk a. Hetihlai hian Mizoram chhunga HIV/AIDS vei zingah 70% chu hmeichhiat-mipatna vanga kai an ni.
Conference hawnna programme hi Mizoram State AIDS Control Society Project Director, Dr. Eric Zomawia’n a kaihruaiin thuhma sawi a, UNODC atangin Pu Kunal Kishore-an Conference neih anih chhan tlangpui a tarlang a ni. Presbyterian Kohhran aiawhin Mizoram Synod Social Front Coordinator Pu H. Lalhmingmawia leh Baptist Kohhran atangin Executive Secretary Rev. Laldingliana ten thu an sawi bawk. Pi Thangseiin lawmthu sawiin hun hnung a khar a ni.
