Vawiin chawhma dar 11 hian Lawngtlai BDO Conference Hall-ah District Election Officer, Lawngtlai District buatsaihin kumin a MLA inthlan lo awm tur atan Lawngtlai West Constituency huam chhunga Booth Level Officer Training neih a ni.

He hunah hian District Election Officer Pu J. Hmingthanmawia, District Bawrhsap ni bawk leh Lawngtlai West Constituency Returning Officer Pu R. Lalsangluaia, Additional DC Lawngtlai District ni bawk, Election Officer Pu VL Remliana MCS leh Pu VL Chhuanawma, SDC Lawngtlai ten training an pe a. BLO te mawhphurhna hrang hrang chu a taka tichhinin zir a ni a, inthlanna hmun sawngbawl dan turte, Polling Party lo dawn sawn dante, Inbiakpawhna tha tak a awm theihna tura ruahmanna lo siam lawk dan te, Lirthei thlen theihlohna khuaa bungraw thiartu tur ngaihtuah dan tur te leh a hun taka report pek dan turte leh Election Commission of India in BLO mawhphurhna a pek thil dangte zir ho a ni.

Booth Level Officer te chu an awmna theuhva Electoral Roll te chu chiang taka hria a, fel lo awm a piangte lo chingfela inthlanna felfai taka neih a nih theih nana inbuatsaih sauh sauh turin District Election thuneitu te hian an fuih a ni.

Lawngtlai West Assembly Constituency huam chhung BLO trainingah hian mi 46 an kal khawm. Hetih lai hian Lawngtlai West Constituency huam chhunga mi BLO dang 7 te chuan an tana pan remchang zawk Chawngte lamah Training hi an nei ve bawk a ni.

Attachment

  • Loading attachment...